Tiun Sape tau ngasuh ati lantang

Genevie Steller ngeransing diri belajar taja terubah iya nadai ngembuan sebarang penemu pasal Sape

“Sape enggau belikan tu taja nadai tentu jauh bida gamal enggau tiun, tang kededua kereban muzik asal tu bisi penyelai enggau pengelebih ba pengelain munyi ti ditebah.”

KUCHING: Bai ati angkunka muzik asal diri ngujungka Genevie Steller, 28 taun, ngeransing diri belajar nebah sape taja nadai ngembuan sebarang penemu pasal kereban muzik asal nya.

Ku Genevie, iya rindu ninga tiun sape ti ayun lundai lalu tau ngasuh ati enggau runding berasai lantang.
“Tiun sape tau ngasuh asai ati kitai lantang, ulih ngaum ati ti ransi, ngasuh ati sinu lalu tau mega ngasuh labuh ai mata enti tiun lagu ditebah nemban ba ati,” ku iya.

Nikal ke kenang keterubah belajar nebah sape Februari 2018 suba, ari peransang apai iya empu, Partie Lanchang, ti rinduka macham bansa muzik, Genevie ngulu kelas ti bisi diatur Akademi Serakup Dayak Iban Sarawak (ASADIA).

ANGKUN… Genevie Steller
ruai-210319-lk-genevie p2

Kenyau ari mit meda apai diri nebah gitar tang bedau bisi ati deka belajar, semina rindu ninga aja, nyangka nya singkang ditunda tauka dititih iya.

Ku Genevie, dalam setaun bisi dua renggat kelas lalu tetiap renggat dua bulan pengelama endur belajarka sape sebedau kitai graduet tauka nembuka pelajar nebah sape.

“Naka diatu, tiga renggat kelas udah disereta aku, nyengkaum kelas belikan ke baru dipasuk taun tu.
“Sape enggau belikan tu taja nadai tentu jauh bida gamal enggau tiun, tang kededua kereban muzik asal tu bisi penyelai enggau pengelebih ba pengelain munyi ti ditebah.

“Asil ari pengepuh bala pengajar ba akademi nya ngajar nyau bisi pengandal ba diri empu nebah sape ba mua mayuh. Belikan tu agi baru amat lalu apin entu teleba nebah iya,” ku Genevie nerang.

Lebuhka belajar ku iya, sida mega suah dibai merindang ba sekeda program tauka pengerami dikena nelebaka diri empu seraya ngiri penemu enggau peneleba baru.

KENANG KETERUBAH… Genevie begulai enggau bala bakih merindang ba sebengkah pengerami nyerumba Gawai Dayak ba Kuching Sentral.

Sida sebakih ti sama ngulu kelas sape mega diberi awak nebah sape ngatika diri enggau beraban nitihka tiun lagu diberi pengajar lalu diperansang naka ulih nunda enggau nengkebang tiun kediri empu.

“Entara peneleba merindang ba mua mayuh agi dikenang nyentuk diatu iya nya nebah sape ba sebengkah pengerami nyerumba Gawai Dayak ba Kuching Sentral ditu.

“Bai ati kesal laban keterubah aku nebah sape atas panggau, bisi berasai rawan tang udah nya nyau sebulu lalu ati temegah amat meda mensia mayuh teperindang,” ku iya.

Ngelansa pasal kelas belikan, ngelama tu Genevie nadai kala meda enggau nemu bansa Iban mega bisi ngembuan kereban muzik nyauka sebaka enggau sape.

Ku Genevie, kededua kereban muzik asal tu endang dikerinduka iya, bela ngasuh ati lantang, teperindang.
“Endang nadai kala ninga orang tuai nyebut. Suah mega pulai ke menua asal apai ba Rumah Bagat, Nanga Ulai, Rimbas di Debak tang nadai nemu utai ke nama belikan tu taja nya rumah panjai asal.

“Tiun ari sape enggau belikan bela ngasuh ati teperindang,” ku iya madah nyemetak.

TEMEGAH… Bala nembiak ti mujur nembuka kelas Sape, Tanda Orang Ulu dirami ba sebengkah pengerami diatur ASADIA

 

PESAKA… Belikan, sebengkah kereban muzik asal Iban.

 

PERANSANG… Apai enggau indai seruran nyadika peransang Genevie mujur ba pengada dikerindu iya.

Suara Sarawak