BINTULU: Bala Tuai Rumah (TR) tauka Tuai Raban Bansa (KK) dilalau patut chakah agi bejalai ke tanggung pengawa sida dikena mai ubah pemansang ke ulih nyungkak ke pengelantang pendiau pengidup nembiak redak ke dipegai sida.
Kaban Kunsil Nengeri (Adun) Samalaju Majang Renggi madah, berindik ari nya, sida dipinta ngerapat ke kaul enggau Opis Pelilih awakka penanggul tauka ke pemar lebuh sida bejalai ke pengawa ulih diputar.
“Tanggungpengawa nyadi Tuai Rumah lebih agi ba pelilih kitai ditu (Bintulu) sigi berat,” ku iya.
Majang mansutka lalau nya rambau Pengawa Nyuaka Setipikit Nyiri Tuai Rumah enggau Tuai Raban Bansa Pelilih Bintulu, pagi tadi.
Ku iya, kelimpah ari mai ubah ngagai rumah panjai tauka genturung pendiau, sida mega meseti landik ngempung diri serumah dikena nyeliahka peranak rumah panjai bepechah.
“Menua kitai ditu semak pasar enggau industri lalu dia mayuh orang datai napatka endur tu”.
“Lalu bisi mega sida datai niki rumah panjai deka bejual barang tauka penemu lalu aku ngarap ke kitai ke tuai nya nemu nyarap semua utai nya,” ku iya.
Bisi 16 iku Tuai Rumah tauka lalu dua iku Tuai Raban Bansa nerima setipikit nya ari Majang seraya ti dikemataka D.O Bintulu, Muhammad Dino Amid.
