Tung gis LPG Petros beresi sereta likun

KUCHING: Tung Gis Petroleum (LPG) ari Petros deka dijual ngagai semua rayat Sarawak sereta sektor dagang enggau industri berengkah taun baru.

Chairman Petros, Tan Sri Hamid Bugor madahka gis nya deka dijual ba mengeri tu enggau Samarahan sereta dikerembai ngagai selampur Sarawak ba taun 2022.

Ku Hamid, Petros LPG berasai temegah laban minyak nya ulih dijual ngagai semua rayat ba Sarawak tu.

“Nengah Petros LPG tu, kitai deka mantu rayat Sarawak ngena minyak ti beresi enggau likun,” ku Hamid.

Hamid mansutka jaku nya lebuh Pengawa Ngelancharka Gis Petros LPG di Kubah Ria ditu, kemari.

Pengawa nya udah dipenyadi Kepala Menteri Datuk Patinggi Abang Johari Tun Openg.

Ku iya, Petros udah nyendiaka gis ngagai lebih ari 25,000 tuai bilik taun tu nengah grid gis paip Petros dipejalai Sarawak Gas Distribution Sdn Bhd.

Nambahka nya ku iya, lebih ari 1,500 bengkah sektor servis enggau industri komersial diseediaka gis nengah Sistem Ngidar Gis ba Bintulu enggau Miri.

Iya mega madahka Petros ngemeratka pengelikun lebuh ngatur produk sida.

“Lebuh bejalaika sebarang pengawa, pengelikun endang dikemeran lalu kami ngarapka bakih enggau pemekal kami mega ngemeratka pengelikun nentuka gis Petros likun dikena.

“Kami bejalaika pengawa tu ngambika produk kami likun dikena kita,” terang iya.

Suara Sarawak