KUCHING: Ba pengawa napi revolusyen teknologi enggau ekonomi pengudah COVID-19, Sarawak ngemerat Pelajar enggau Latih Teknikal sereta Vokasional (TVET) nyadi pelasar besai nempa pengereja lokal landik enggau pintar teknologi. Premier Sarawak, Datuk Patinggi Tan Sri Abang Johari Tun Openg madah, TVET nyadi injin besai nyikap pengereja pengawa napi pemar ekonomi global enggau pengerembai teknologi moden.

“Sarawak diatu ba pintu transformasyen ekonomi ti disungkak Pemintar Digaga (AI), teknologi moden enggau pemeruan global.

“Transformasyen stuktur ekonomi tu nambah peminta ngagai pengereja lokal ukai semina landik teknikal tang bepenemu ba teknologi baru sereta ulih nelebaka diri enggau guna industri dudi hari,” ku iya.

Abang Johari bejaku munyi nya lebuh teks jaku iya dibacha Sapit Menteri Pelajar, Inovasyen enggau Pemansang Penau, Datuk Francis Harden Hollis ba Program Anugerah Jari Emas Premier Sarawak 2025 ditu, kemari.

Tampung iya, pengulih Sarawak ngemansang modal mensia bekualiti tinggi nyadi penentu besai penyulut nengeri ba pengawa ngamat aspirasyen pemansang.

“Nya alai, TVET nyadi penyungkak pemansang penau nengah pengawa beranakka puku ngemanah fasiliti latih enggau nambah kualiti pengawa ngajar.

“Pia mega, TVET ngesan pangku pengawa negap kerejasama enggau bakih industri ngambi latih meruan relevan enggau guna makit,” ku iya.

Ngelansa silik, WorldSkills Malaysia Sarawak (WSM-Sarawak) ngesan pangku pengawa nyadi pelasar strategik dikena ngelala enggau ngemansang pengulih nembiak.

“Pelasar tu ngasuh bala penyereta bulih peneleba ngagai standard pengelandik tikas dunya, teknologi moden, latih bestruktur enggau embing pakar.

“WSM-Sarawak ukai semina nempa pengereja landik tang nempa rebak pemekuh industri ti ulih nyungkak pemansang kuing Sarawak,” terang iya.

Abang Johari muji penyulut bala anak Sarawak ti bulih bemacham anugerah di renggat nasional enggau antarabansa nengah WorldSkills.

“Tabi puji ngagai semua kita, duta mit ti ngemegah nama Sarawak enggau Malaysia kelimpah nyadi bukti pelajar TVET nyadi pilih ti nemban enggau bekualiti,” ku iya. Iya nyemetak madah, kerejasama entara sektor perintah enggau peribit beguna amat dikena ngemansang landskap penau nengeri.

“Program baka Akademi Dalam Industri (ADI) deka nentu Sarawak ngembuan pengereja dudi hari ti landik, ulih semekih enggau sedia nyukung industri moden.

“Aram mih kitai terus bekerejasama, bela nyukung enggau beranakka puku ba pengulih rebak biak ngambi begulai nempa kuing Sarawak ti maju ari sukut ekonomi, sosial enggau pemeruan,” tampung iya.

Abang Johari bela meri terima kasih ngagai semua ejensi enggau panel pemeresa ti nentu pengawa ngatur WSM-Sarawak nyapai penyulut besai.

“Aram mih kitai nyingkang ke mua enggau semangat Segulai Sejalai, Seati enggau Siti Tuju dikena ngamat aspirasyen Sarawak nyadi kandang menua lantang, progresif enggau bepenatai pemisi tinggi manggai 2030,” ku iya nyemetak.

Bela datai, Sapit Menteri ba Opis Premier Sarawak (Undang-Undang enggau Adat Bumiputera), Datuk Jefferson Jamit Unyat enggau Sekretari Mendam Opis Menteri Pelajar, Inovasyen enggau Pemansang Orang Dagang, Adana Jed.