KOTA SAMARAHAN: Pengawa ngena skuter kuasa karan (e-skuter) tauka BEAM endang nitih ke atur pengelikun enggau pengelantang ti udah disetuju entara Business Development Unit (BDU) enggau Universiti Teknologi Mara (UiTM).
Rektor UiTM Sarawak, Profesor Datuk Dr Jamil Hamali madah, sida endang deka bekerejasama bekaul pekara pengelikun ti ngaul bala nembiak dia.
“Kami udah baum lalu udah netap ke atur pengelikun dikena nentu ke pengelikun bala nembiak maya ngena servis skuter tu nyengkaum arung jalai ditengah sida enggau entepan e-skuter.
“Pia mega, kami udah ngeletak tikas pengelaju ngena e-skuter dikena nyeliah nembiak belumba ba kampus.
“Program tu seraris enggau juluk Perintah Sarawak ti deka ngemansangka inisiatif teknologi gadung dalam menua.
“UiTM deka nambah mayuh agi inisiatif bukai dikena nyukung juluk ati perintah tu,” ku iya.
Dr Jamil mansutka jaku nya rambau dirandau pemberita pengudah ngelancharka e-skuter ba UiTM Kampus 1, Samarahan, ditu kemari.
