LUNDU: Projek Umai Tebaro deka nyamin bekal pemakai komuniti ngambi enda kelalu bepanggai ba berau import.
Kaban Kunsil Nengeri (ADUN) Opar, Billy Sujang madah, projek nya nyadi inisiatif keterubah pemansang umai ba menua nya nengah Ejensi Penyeraris Pemansang Kuching Angkat Mansang (GKCDA). Ku iya, inisiatif nya udah dilanggur kenyau ari taun 2023 nengah woksyop enggau randau begulai enggau peranak menua nya sereta ejensi bekaul, ti digulu 51 iku orang bumai ba dia.
“Ba dunya ke enda tentu kemaya hari tu, bekal pemakai kelebih agi berau endang nyadi siti guna ti strategik.
“Kitai enda ulih kelalu bepanggai ba import, tang kitai meseti nanam kediri ngira pengelantang dudi hari,” ku iya bejaku maya Program Nyua Taba Projek Nyeruri Sistem Infrastruktur Umai di Kampung Tebaro ditu, Hari Dua tu tadi.
Iya mega madah, Perintah Sarawak udah nyendiaka agih belanja ke besai dikena nyungkak sektor betanam betupi nyengkaum bumai lalu deka ngangkatka menua nya nyadi palan ngeluarka benih padi dudi hari.
Agih belanja keterubah projek nya sepenyampau RM2.5 juta deka dikena ngaga sistem parit, jalai enggau perengkaguna bumai ke bukai. Billy mega madah, projek nya meseti digaga enggau mujur nitih ke timpuh ke udah ditetapka ngambi pengawa nanam padi ulih berengkah enggau lengkas sebedau ujung taun tu.
Iya ngelalau peranak menua nya ngena perengkaguna ke diberi enggau manah.
“Enti dikena enggau manah, sehektar umai ulih ngasilka nyentuk semilan tan padi setaun.
“Tu ukai semina nambah penatai pemisi kitai tang mega ulih nyamin bekal pemakai komuniti,” ku iya baru. – EDISI UKAS
