SIBU: Kaban Kunsil Nengeri (ADUN) Tamin, Ir. Christopher Gira Sambang keran mantu rumah sembiang ba sitak iya ngulihka agih belanja ari Unit Pekara Pengarap Bukai (UNIFOR) Sarawak ungkup tuju pemansang enggau nyeruri perengkaguna.
Ku iya, nyadi pengari rayat, sukung nyengkaum nyendia surat rasmi ngagai UNIFOR deka terus diberi ngagai sebarang rumah sembiang ba Kunsil Nengeri (DUN) Tamin ti begunaka bantu belanja nadai ngira jalai pengarap seriris enggau prinsip pengelantang enggau penyerakup pupu bansa ba Sarawak.
Pekara nya dipadah iya lebuh ngulu Pengerami Makai Lemai Jubli Emas serimbai ngintu genap taun ke-50 penumbuh Gerija St. Gerard Sekuau ti diatur ba siti restoran, Hari Enam tu tadi.
Ba pengerami nya, Gira ngemendar agih belanja RM20,000 ari geran Projek Mit Pemansang Menua Pesisir (MRP) ngagai Gerija St Gerard Sekuau kelai sukung ngatur aktiviti pengarap enggau komuniti gerija nya.
Gira mega meri meri terima kasih ngagai UNIFOR laban meruan nyaup pemansang sereta nyeruri rumah sembiang mayuh jalai pengarap ba nengeri tu nengah kerejasama rat enggau pengari rayat.
Iya mega ngenang jasa pemungkal Gerija St Gerard Sekuau, niang Gerard Balang ti numbuh gerija nya ba taun 1975 seraya nyemetak madah ke institusyen gerija ukai semina nyadi palan sembiang tang mega beguna ba pemansang pengarap enggau sosial komuniti kelebih agi raban Kristian Roman Katolik (RC) ba sitak Selangau.
Pia mega, Gira meri terima kasih ngagai bala Father enggau Sister laban ngerichah Christmas Carol dia ti nyadi lambang pengelantang, bebatak asur enggau semangat beserakup entara komuniti.
“Penyampau raban RC ba sitak Selangau diatu dipelaba 10,000 iku seraya nyeremin pangku pengawa signifikan institusyen gerija nyaga pengelantang sosial enggau pengarap komuniti lokal.
Nya alai, ngena peluang nya Gira meri Selamat Hari Krismas enggau Taun Baru 2026 ngagai semua peranak DUN Tamin sereta ngarap semangat beserakup, bebatak asur enggau bela bebasa ke pangan diri terus ditegap ke pengelantang begulai.
