Untan landik ngaga bemacham bansa gendang

GENDANG tu entara bansa kereban muzik suah ditempap lebuh bisi pengerami besai kelimpah iya besai reti ba pengidup raban bansa Dayak Iban.

Pengeran ngangkatka pengawa asal kitai Iban enggau nampung pengelandik niang aki iya di Ulu Skrang suba, Untan Kedit, landik amat begagaka bemacham bansa gendang.

Peranak asal Baloi Skrang nya madah, iya diatu ngaga gendang nya ba Kampung Semalatong Lama, Simunjan laban nguai lalu diau mendam ba menua bini iya.

Lebuh dirandau, Untan madahka diri belajar ngaga gendang ari niang aki iya dalam taun 2011 tang apin bisi ati ngemeranka pengawa nya baka diatu.

Dalam bulan November 2017, iya mutus ati ngemeranka pengawa begagaka gendang ti diasai ulih nyadi batang pengawa enggau dikena ngiga belanja ke sida sebilik.

TEPA… Untan suah nerima udar nyadi tanda kenang bala ti nemuai ngagai menua tu.

Entara bansa gendang digaga Untan iya nya ketebung, dedumbak, gendang asal Bidayuh enggau sebana.

Ku Untan, pengawa ngaga siti gendang tu lawit amat sereta mayuh rurun nyentuk gendang nya tembu enggau manah dipeda.

Iya mega bisi ngaga pengitang tawak, lesung tebelian, sengkan engekerumung, ringka pinggai lama enggau terebai mit kelimpah ngukir bansa kereban nya nunda ukir asal kitai Iban.

“Siti gendang nya begunaka awak seminggu dua laban nganti kayu rangkai ngambika gendang nya nyamai diukir enggau manding dipeda nitihka peminta bala penguna ti ngudar gendang ari aku,” ku Untan.

“Pia mega, pengelama ngaga gendang nya nitihka gaya kayu sekalika kayu lemi tauka kering.

PESAKA… Dedumbak ti udah tembu digaga Untan.

“Enti kayu kering, enda ibuh nganti kayu rangkai laban ditemu teguh. Semina kayu lemi aja nganti dataika chukup rangkai laban nangika kayu nya nemu ngedar,” ku Untan nerang sentang pengawa milih kayu digagaka gendang.

Entara bansa kayu ti suah dikena Untan ngaga gendang tu iya nya Pelaie Bukit tauka Jeluntong, Temedak, Selangking enggau Tebelian.

“Udah tu, aku deka nguji ngena kayu tapang ngaga gendang laban nemu bansa kayu tu teguh.

“Kebuah pia laban peneguh kayu nentuka kualiti utai digaga aku ngambika bala penguna ti meli puas ati ke gendang digaga setipak enggau rega dibayar sida,” terang Untan.

Nangkan nya, kereban bukai dikena ngaga gendang tu mega iya nya kulit kabit, wie enggau pat dikena ngukir gendang enggau produk bukai.

LANDIK… Untan benung kiruh ngerangka ketebung ti diudar bala penguna nyadika tepa.

Ngelansa silik, Untan madah, entara gendang ti suah diudar iya nya gendang 32 inchi, 3 kaki enggau 26 inchi dibeli bala ke bejual set betabuh enggau kedai nyual asil pengelandik jari.

“Naka diatu, ketebung tebelian entara gendang ti pemadu mar kala dibeli iya nya berega RM650 kelimpah kayu tebelian tu endang teguh enggau bekualiti tinggi.

“Berasai gaga amat laban nerima mayuh udar ari bala penguna kelai kereban asal kitai tu nerima mayuh peminta, kadang sebulan sigi enda kurang ari 10 iti gendang diudar orang,” ku iya sentang peminta bala penguna.

Barang sapa ti deka meli gendang tu, tau ngudar ba Untan nengah page Terebai Apai Craft & Deco tauka nengah Whatsap ba lumur, 01159800356 lalu penerang silik tauka tanya bukai tau peda ba page nya.