Ketegal ngembuan pengerindu besai ba pengawa belagu, Muhd Rozian bin Marang ti tampak agi dikelala ngena nama panggau, Watt Rock nyingkang ba dunya pemerindang.

Ngembuan sada nyawa ti chukup lunak sereta engkeman didinga, Watt Rock entara artis Iban ti chukup tebilang kemaya hari tu.

MAJAK DIKELALA

Lagu Nujah Duri Menasan Puntan mujur ngangkatka nama iya ba dunya pemerindang.

Lagu nya ditengkebang Embat Lala asil ari keranjai jari Harry Usop Umbar lalu dikeluarka ba baruh perabung PBP.

Bala bukai ti bela nengkebang lagu disadaka Watt Rock iya nya Depha Masterpiece, Will Masterpiece, Matius Mambang enggau Jesley Jabu (Teganggam).

“Lagu Sama Niki ti suah didinga ba churung radio enggau program bukai tu ditengkebang Franky Man lalu dikeluarka ba baruh serikat Kaban Music Production (KMP).

“Sama Niki tu siti lagu ti ulih meri peransang enggau semangat ngagai orang sereta suah ditebah ba program diatur Gerempung Ukai Dikuasa Perintah (NGO) enggau mayuh pengerami bukai,” ku Watt Rock.

Nampung nya, Watt Rock madah, iya semina bisi siti album ti ngundan lapan iti lagu lalu ungkup lagu kediri (single) iya bisi tiga iti lagu.

LAGU BARU

Pengerembai pemadu baru ari Watt Rock iya nya deka datai enggau lagu baru ti diberi nama Sama Saum Ati ditengkebang Will Masterpiece.

“Pia mega, bisi siti demo lagu pemadu baru ari aku mujur dianjung lalu semina nganti nyeruri muzik aja,” ku iya.

Bekaul genre lagu dikerindu, Watt Rock madah, iya endang rindu nyadaka lagu berentak rock taja keterubah belagu suba iya berengkah enggau rentak lagu lama.

RESIA BELAGU

Watt Rock mega nusui, resia iya ngetanka sada nyawa iya nya seruran matih diri abis nadai sejam tauka lima hari dalam seminggu.

“Pengawa matih tu beguna amat dikena kitai ngiga pengurang ti apin ditemu ba diri kitai empu.

“Pia mega, anang ga kitai mejal diri maya matih diri lalu seruran ngirup ai enggau ngembuan tinduk ti chukup.

“Aku seruran ngaga sesais ngambi bisi pengering lebuh merindang peminat ba timpuh ti belama,” ku Watt Rock ti kala ngeluarka lagu ba baruh perabung KMP.

Ku iya, pilih palan ti engkeman endur matih sada nyawa tang enti ulih ngena kereban muzik ngambi kitai nemu ngelinggukka sada nyawa.

PENGERINDU BELAGU

Penanyi ti datai ari Rumah Catherine Tamuh, Sungai Aup Sibu, nya madah, pengerindu iya ba pengawa belagu nya bepun ari pengawa iya ti suah meda program belagu ba televisyen.

“Pengerindu aku belagu tu nyangka ketegal aku ti suah meda orang belagu ba televesyen maya agi mit suba.

“Berebak ari nya, aku nguji nyadaka lagu lalu matak singkang berani enggau orang ngeruh ai masuk pekit belagu ba Bagi Menua Sibu.

“Maya bepekit tu, aku enda milih bansa lagu sekali ke tu lagu Melayu tauka Iban endang disadaka aku.

“Aku kala bulih gelar champion ba pekit belagu diatur Radio Televisyen Malaysia (RTM) Sibu iya nya ba taun 2005 enggau 2010,” ku Watt Rock.

PEJALAI MERINDANG

Berebak ari pemujur nya, Embat Lala meri iya peluang ngerikod lagu ba baruh perabung Panggau Buluh Pengerindu (PBP).

“Ari tu meh aku berengkah nyingkang lalu tepejuh nyadi siku pemerindang ba industri muzik kitai Iban ba taun 2012 nyentuk diatu.

“Maya tu suba, aku nerima demo ari Embat Lala ungkup lagu keterubah aku,” ku iya.

Terang Watt Rock, sesiku penanyi endang seruran bisi orang nyadi tulang sukung enggau meransang dikena nyingkang jauh agi pengawa diri merindang.

Baka nya mega iya seruran nerima peransang enggau sukung penuh ari sida sebilik kelebih agi bini ti dikesayau iya.

“Sida meh nyadi pun pengering aku lebuh aku rebah tauka tepawah singkang ba dunya pemerindang.

“Pia mega, ba industri pemerindang, aku kala nerima jaku pejah tang aku meransang diri empu ngambi majak nyingkang ke mua nerus pengawa belagu,” ku tusui Watt Rock.

PAIT MANIS MERINDANG

Lebuh dirandau Ruai Suara Sarawak bekaul pemar ditapi lebuh ngerikod lagu, Watt Rock madah, nya meh pengawa ti chukup enchabar ba iya.

“Maya ngerikod lagu, mayuh amat pemar ditapi aku laban siti lagu bisi empat tauka lima kali ngerikod.

“Aku naka ulih ngemerat ke kualiti lalu ngaga pemadu manah ngambi bala peminat enda lebu ninga lagu aku.

“Amat rangkai asai batang rekung maya ngerikod lagu taja pen tu semina siti aja lagu,” tusui iya bekaul pemar ditapi maya ngerikod lagu ba studio.

Tang diatu ku iya, dunya nyau majak maju sereta mayuh teknologi digital ti ulih ngemuntang ke pengawa ngerikod lagu enti dibanding kelia.

Kelimpah betapi enggau pemar maya ngerikod lagu, Watt Rock mega kala napi penguji lebuh merindang peminat.

“Bisi sekali lebuh aku merindang peminat ba sebengkah palan, enda memukai sada nyawa aku enda ulih pansut tak semina meresu aja.

“Nyangka bisi salah chara maya aku belagu maya tu suba,” ku pemenggi Anugerah Vokal Pemadu Manah ba malam Anugerah Charta Sapa Juara (ASCJ) Ke-4 taun 2017.

KENANG MERINDANG

Ngelansa kenang ti kala diasaika iya sekumbang begelar penanyi, Watt Rock nusui, iya suah nyempulang Embat Lala ngaga video lagu bala penanyi ti dulu agi ari iya.

“Nyau deka selampur video artis lama ba PBP, aku seruran bisi nyempulang Embat Lala ngaga video lagu sida.

“Mayuh pengawa dikereja aku baka ngumpul butul ai ti udah abis diirup bala artis.

Aku suah nyempulang Embat Lala mindah kin kia enda ngira siang enggau malam.

“Tu meh siti chara dikena aku muai peninggi ati diri sebedau nyadi artis ngambi enda sumbung enggau orang,” ku Watt Rock.

Ku iya, semua peneleba ti kala diasaika nya nyadi kenang berega dalam pengidup iya nyadi siku pemerindang.

“Terima kasih ngagai bala peminat ti seruran sukung aku lalu kita meh nyadi pun peransang aku ba dunya pemerindang.

“Terus meh meri nyukung aku ngambi aku ransing agi ngeluar lagu baru dudi hari sereta merindang kita semua ba selampur menua,” ku pesan Watt Rock.

Dikena ngujung ke randau diri, Watt Rock ngelalau bala peminat diri ngambi seruran nitih Facebook enggau TikTok iya dikena nemu pengerembai pemadu baru ari iya.