SRI AMAN: Kontinjen Zon Utara dipadu nyadi champion besai Lumba Sarawak (SUKSAR) IV 2026 ti tembu diatur ba Stadium Betutup Sri Aman, ditu kemari.
Raban ari tiga bagi menua (Bintulu, Miri, Limbang) mujur bulih 108 midul iya nya 39 midul emas, 37 midul pirak enggau 32 midul engkeraju.
Zon Utara mujur ngalahka champion edisyen ti dulu iya nya Zon Selatan (Kuching, Kota Samarahan enggau Serian) ti bulih penuduk kedua lebuh bulih 82 midul iya nya 30 midul emas, 28 midul pirak enggau 24 midul engkeraju.
Nangkan nya, Zon Barat (Sri Aman, Betong enggau Sarikei) bulih penuduk ketiga nengah bulih 70 midul iya nya 19 midul emas, 14 midul pirak enggau 37 midul engkeraju.
Seraya, kontinjen Zon Tengah (Sibu, Mukah enggau Kapit) bulih penuduk keempat enggau 75 midul iya nya 17 midul emas, 24 midul pirak enggau 34 midul engkeraju.
Nambah ke nya, atlit ensikal ari Zon Selatan, Zhen Xiang Kenny Lim ti nyulut bulih empat midul emas dipadu nyadi penerima anugerah Olahragawan Harapan.
Nur Ain Ramadhania Abdullah, atlit ensikal ari Zon Barat ti nyulut bulih lima emas dipadu nyadi penerima anugerah Olahragawati Harapan.
Seduai bela nerima mata duit RM1,500 sereta trofi.
Pengawa nyua perais enggau anugerah nya udah dipenyadi Premier Sarawak, Datuk Patinggi Tan Sri Abang Johari Tun Openg.
Sama datai, Menteri Nembiak, Lumba enggau Pemansang Orang Dagang Sarawak (MYSED), Datuk Seri Abdul Karim Rahman Hamzah, Sapit Menteri MYSED, Datuk Gerald Rentap Jabu, Sapit Menteri Pelajar enggau Pemansang Penau Sarawak, Francis Harden Hollis, bala sapit menteri, pengari rayat, tuai opis sereta tuai komuniti lokal.
– FAIZAL BUJANG
