Mulaika pengingat, berita pemadu baru artis GPRS -Jennarino Jeraki

Jennarino Jeraki, 46 siku ari penanyi Iban tebilang keterubah dikelala peminat ba industri muzik lagu Iban nengah lagu Endena dikeluar ba taun 1995.

Raban penanyi bukai ti bela chakah ngerikod lagu maya nya baka Johny Aman, Andrewson Ngalai, niang Michael Jemat sereta mayuh agi ke bukai.

Serak tu, Suara Sarawak mai kitai ngelansa cherita pengingat enggau berita pemadu baru ari Jennarino empu ke mega menijar serikat rekording Golden Pearl Recording Studio (GPRS).

MULAIKA PENGINGAT

Ku Jenarino, sebedau nyadi artis iya mega baka orang bukai kala ngasai pemedis maya ngidup kediri iya nya kala enggau orang gawa kunterik, kelindan lori, gawa restauran sebedau betemu enggau emperaja mata iya nya Jenny Tan mega siku ari orang ke landik belagu.

“Aku keterubah betemu enggau Jenny ba Kuching maya aku agi gawa sebuah restauran Jipun urung taun 1994. Kenyau ari nya pengudah ti lama bekelala, sama bela bisi pengeran ati ke pangan diri, kami duai pan mutus ati terus nirika rumah tangga dalam taun 1995.

ALBUM ENDENA…Album keterubah Jenarino begulai enggau Jenny Tan sereta Lucas Casidy.

“Jenny ke mega dikelala mensia mayuh enggau lagu Lelaki kebendar penakan Iban China. Iya dulu ari ngerikod lagu Iban iya nya dalam taun 1992 dirikod ngena muzik ari raban Kombo Polis Diraja Malaysia (PDRM).

“Endang nyadi juluk ati semua penanyi deka bisi studio diri empu alai ngerikod lagu, lalu kitai ba GPRS pekara tu nadai pulaika penanggul. Semua bisi magang,” ku iya.

GPRS ditumbuh ba taun 1992, lalu taun tu manggai 28 taun udah beretan lalu mujur ngangkatka mayuh penanyi Iban baka Lucas Casidy,Betty,Timothy,Watson Jelai,Tony M, Lakuang Ading, Franky Wilson, Mickey M, Salomi Likan, Clara,Rosita Kaya, Wat Andom, Mr.Cifu, Morgan Alban sereta mayuh agi ke bukai.

“Penanyi pemadu lama serebak enggau kami mungkal GPRS iya nya Lucas Casidy ti tebilang enggau lagu Peram Peram Buah Ku Peram taun 1998. Lucas tu asal ari Sungai Jagu Abit,Serian penakan Iban Bidayuh,”ku Jennarino.

ALBUM KETERUBAH

SITI ARI ALBUM BARU…Entara album pemadu baru GPRS ti deka pansut nyerumba Gawai Dayak tu ila.

Album diberi nama Endena nyadi album keterubah digaga aku begulai enggau Jenny Tan sereta siku agi bakih aku iya nya Lucas Casidy.

Sebedau nya, aku empai bisi runding deka nyadi artis rikoding tang pemuas ke diumbuk Jenny aku pan setuju ngaga album lagu Iban ke benama Endena.

“Lepas album tu pansut dia kami berasai tegepang laban album nya nerima timbal ke chukup manah ari bala peminat.

“Arinya bepun meri peransang ngagai aku empu enggau bala bukai chakah agi nempa lagu sereta muzik nitihka peminta bala peminat nyentuk ke sehari tu,” ku iya.

Kelimpah ari sukung peminat, peransang ari Jenny empu enggau bala bakih chukup meri semangat ngagai iya dalam nempuh pemar dalam dunya pemerindang.

MERINDANG…..Jennarino maya dikanggau merindang ba sebengkah palan pemerindang di Kuching apin lama.

ALBUM BARU GPRS

Ngelansa pasal pengawa ngaga album baru Jennarino nadai beresia madah GPRS bisi berita manah iya nya benung ba renggat ke penudi nembuka lagu ungkup album iya empu ke dipelaba pansut nyerumba Hari Krismas ila.

“Nyema nadai penanggul album baru ari aku empu disadang deka dipansut nyerumba Krismas taun tu.

“Kelimpah ari album aku empu, GPRS mega deka ngemansutka album Timothy ti deka berengkah dijual ba bulan September pengudah tejanggal laban pengerekai igi penyakit Covid 19 diatu,” ku iya.

Bekunsi mimit pengawa maya sekumbang Atur Tagang Pejalai (PKP) diatu, Jenarino madah awak diau diguna ngereja pengawa dalam studio baka ngadu lagu ungkup album kompilasyen ke deka dikemujurka Lucas Casidy, Mickey M,Salomi Likan enggau Rosita Kaya diberi nama Album Kompilasi Besatu Maju.

Entara lagu dipelaba ‘meletup’ dalam album tu ila iya nya lagu Dara Manis Gula Apong (Lucas Casidy) disadang berengkah dijual nyerumba Gawai Dayak tu ila.

PENGAWA LEPA

JENNARINO JERAKI

Jennarino peranak asal Kampung Blau, Simunjan, anak tuai ari tiga diri menyadi.

Iya pemadu rinduka pengawa bemain bol lebuh maya lepa. Kelimpah ari belagu iya mega rindu nebah gitar, nengkebang lagu, main takraw sereta berandau enggau bala kaban.

“Aku asal ukai orang pemisi, nya kebuah nadai berasai sanggu bebakih enggau sebarang aja orang.

“Pengidup suba enggau diatu semina dipuntang enggau seleka jaku iya nya dikumbai pemansang.

“Enti bisi pengeransing tentu kitai deka teulihka pemujur tauka pemansang ba pengidup laban kitai tu bela sedar diri bepenatai ari rumah panjai tebela ngasai pemedis kenyau ari mit.

“Pemar ditapi nyadi penanyi sigi amat mayuh enda alah rintai semina kitai empu aja nemu, tang ba aku siku pekara ti manah ambika chuan lalu ke jai nyadika adan,” ku iya.

ARAP BISI STESYEN TELEVISYEN IBAN

Jennarino ngarapka industri muzik sereta lagu Iban terus pegari laban diatu dunya pan udah mansang kitai patut nitih singkang nguna palan digital baka media rama endur ngelakuka lagu Iban kelimpah dijual ba sebelah kedai.

“Enti semina ngarapka dua bengkah stesyen radio ke bisi diatu dikena ngelakuka lagu-lagu kitai Iban tentu bisi penanggul laban timpuh sida dj ke gawa kelalu pandak.

“Tu bisi besibil enti dibanding enggau timpuh bemainka lagu-lagu bansa bukai,” ku iya.

Nya alai, arapka jemah kitai Iban deka bisi stesyen televisyen kediri kelimpah ari radio dikena ngangkatka agi industri muzik lagu Iban enggau pengawa seni Iban ke bukai.

Berebak enggau nya mega, aku arapka pengawa enda beradat baka chelak tiru terus dikemeratka piak bekuasa dikena ngetanka hak raban artis ke udah bekenanas ngasilka album.

Lebuh ditanya sentang surat kabar Suara Sarawak ti bisi nyendiaka sukut Ruai Pemerindang, iya madah tu siti pelasar ke chukup manah lalu terima kasih nuju semua piak ke bekaul.

“Ba penemu aku, tu atur ke endang badas laban bisi alai kitai mantaika penemu nengah jaku kitai empu.

“Arapka nengah sukut ruai pemerindang tu kitai bisi peluang mansutka penemu diri ungkup pekara ke manah lalu ukai dikena ngelabuh pangan diri.

“Pia mega, nuju semua pengemeran industri muzik Iban arapka semua kitai bela lurus ati dalam ngasilka karya seni, awakka lagu kitai semampai ngasuh gidan tauka enda leju didinga mensia mayuh,” ku iya.