1,200 tukun tiru ditanam di Sungai Muara Tebas -Sebuyau

KUCHING: Sepenyampau 1,200 tukun tiru ditanam ba sepanjai tebing sungai Muara Tebas nyentuk Sebuyau, ditu kemari.

Kepala Menteri Datuk Patinggi Abang Johari Tun Openg madah, ba inisiatif nyaga enggau ngetanka rampa menua mega nyadi sebagi ari Projek Tukun Tiru Sarawak (SRBP), piak Sarawak Forestry Corporation (SFC) dilempai tanggungpengawa matau ngelingi kandang tasik nya.

Ku Abang Johari, kenyau ari taun 2018, SFC udah nanam 600 tukun tiru ba kandang tasik Belawai-Paloh, 600 tukun tiru ba kandang tasik Lawas enggau 1,200 tukun tiru ba kandang tasik Igan-Mukah.

“Nya alai, Perintah Sarawak udah ngagihka belanja RM70 juta dikena nanam 17,200 unit tukun tiru ngelingi kandang tasik Sarawak bepun ari taun 2018 ngagai 2021.

“Nya kebuah kami terus nyaga kandang tasik enggau rampa menua ba menua tu,” terang iya.

Datuk Patinggi Abang Johari Tun Openg

Abang Johari mansutka jaku nya ba aum pemberita pengudah bejadika Pengawa Nanam Tukun Tiru ba Tebing Tasik Muara Tebas-Sebuyau, ditu kemari.

Terang iya, inisiatif tu deka nempa ekonomi dagang temuai baru ba Sarawak ke alai bisi endur nyelam ke tau matak temuai ari dalam enggau luar menua.

“Tu mih utai diselintang kami lalu Perintah Sarawak chakah ngiga chara enggau belanja tambah ngambika pekara tu mujur dipejalai,” terang iya.

Ku Abang Johari, inisiatif tu pulaika pemanah ngagai orang berikan enggau nyaga utai ti idup ba kandang tasik nya.
“Tukun tiru tu ukai semina nyendiaka endur ikan tang mega nyaga utai idup dalam tasik ngambi enda dikeruga sida ti berikan ngena chara ti salah ngena selambau enda dikemendar,” ku iya.

Terang iya, pengudah nanam tukun tiru tu, asil ikan ti ditangkap nitihka penerang diterima majak nambah kelimpah nambahka penatai pemisi peranak menua enggau deka nyungkak tikas idup rayat.

“Nitihka penerang, pengudah kami nanam tukun tiru tu ba Taman Negara Similajau Bintulu, penyu gadung pulai baru ngagai taman negara nya pengudah 7 taun.

“Pia mega, karang ba kandang tasik nya majak besai ari 10 ngagai 12 cm ba timpuh dua taun, 18-20 cm ba timpuh tiga taun enggau 30-40 cm ba timpuh tiga taun setengah.

Pengudah kandang tasik Muara Tebas-Sebuyau, pengawa nanam tukun tiru tu mega deka dipejalai ba Daro ngambika utai idup ba kandang tasik nya pulai baru ngagai endur asal sida.

Sama datai Menteri Pemansang Orang Dagang enggau Gerempung Kerejasama Datuk Seri Dr Wan Junaidi Tuanku Jaafar, Menteri Dagang Temuai, Seni enggau Main Asal Datuk Abdul Karim Rahman Hamzah, Menteri Muda Pemansang Mengeri enggau Pengeraja Asal Datuk Len Talif Salleh enggau Ketuai Pemesai Eksekutif SFC Zolkipli Mohamad Aton.

Suara Sarawak