13 taun ‘lenyau’ Saberkas Run diatur baru

KUCHING: Saberkas Run 2019 deka diatur baru kena 15 September tu pengudah ‘lenyau’ 13 taun pengelama.

Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah madah tu keterubah iya Saberkas ngatur pekit belanda pengudah Larian Saberkas Entarabansa Marathon 2006.

“Pekit tu diatur sehari sebedau Hari Malaysia lalu tu sebagi ari chara kitai nerenakka penyerakup pupu bansa di menua tu.

“Sekali tu, kami nagit 3,000 iku deka rejista diri nyereta pekit tu,” ku iya nambah.

Abdul Karim mansutka jaku tu rambau aum pemberita di Baitulmakmur ditu kemari seraya nambah, bisi tiga kategori pelanda diungkup ngagai mensia mayuh.

SABERKAS RUN 2019… Abdul Karim disempulang bala bukai rambau aum pemberita Saberkas Run di Baitulmakmur ditu, kemari.

“Entara kategori disedia iya nya ‘Unity Run’, ‘Family Run’ enggau ‘VIP Run’, ti deka sama meleka ari adan di Begunan Dun Lama ditu, taja penyauh pelanda bebida,” ku iya nerang ngagai pemberita.

Ku Abdul Karim, penyampau bayar tiga kategori tu iya nya Unity Run (RM50), Family Run (RM30) enggau VIP Run (RM20) siku.

“Bala pemenang deka nerima midul mas, pirak enggau engkeraju disempulang baju enggau setipikit.

“Bala penyereta ti udah rejista mega deka diberi bekal pemakai enggau ai, baucher, perais sereta midul tembu belanda,” ku Abdul Karim nambah.

Saberkas Run 2019 berambaika jaku ‘Today for Tomorrow-Sayang Sarawak’, diatur nengah kerejasama entara Saberkas Nengeri, Saberkas Pampang Kuching, Opis Menteri Dagang Temuai, Seni, Main Asal, Nembiak enggau Lumba, UCSI enggau Serakup Pansik Sarawak (SRS).

Barang sapa bisi ati nyereta pelanda tau matak pom ari facebook Saberkas Run 2019 tauka ngelawa opis Saberkas di Ringkat 20, Wisma Saberkas lalu pom enda tau enda dianjung sebedau tauka abis laun 15 Ogos.

Suara Sarawak