KUCHING: Bisi 19 atlit para Sarawak nerima insentif sepenyampau RM140,200 berindik ari penyulut sida ba ASEAN Para Games Korat Thailand 2025 ti diatur ba Nakhon Ratchasima.
Bini Tuai Pemegai Menua (TYT) Nengeri Sarawak, Toh Puan Datuk Patinggi Fauziah Mohd Sanusi sereta Menteri Pemansang Indu, Nembiak Mit enggau Pengelantang Komuniti, Datuk Seri Fatimah Abdullah dibasa nyua insentif nya ba Program Apresiasyen Negu Ati, Nempa Runding ti diatur ba siti hotel tebilang ditu, malam kemari.
Siku penerima insentif pemadu tinggi iya nya atlit nyemerai para menua, Rusdianto Rusmadi ti mai pulai insentif sepenyampau RM22,000 ketegal mujur bulih dua midul emas, empat pirak enggau dua engkeraju.
Nya dientudi ke siku da atlit nyemerai para menua, Muhd Nur Syaiful Zulkafli nerima insentif sepenyampau RM18,000 pengudah bulih siti emas, empat pirak enggau tiga engkeraju.
Atlit ping pong para, Gloria Gracia Wong Sze nerima insentif RM13,000 pengudah bulih dua midul emas enggau siti engkeraju lalu atlit tenpin boling para, Abang Yahya Abang Azhar nerima insentif RM12,500 pengudah bulih dua midul emas.
Pia mega, atlit ti nerima insentif sepenyampau RM10,000 pengudah bulih siti midul emas iya nya Norzhazwani Maisara Marzuki, Bibiana Ahmad, Colorine Sijang, Nicodemus Manggoi Moses enggau Bonnie Bunyau Gustin.
Bela nerima insentif iya nya Marcos Chang Hao Hong sepenyampau RM7,000 pengudah bulih siti midul emas enggau siti pirak lalu Wong Kee Soon nerima RM5,000 laban bulih siti midul emas.
Seraya nya, Mohd Adib Iqbal Abdullah nerima RM3,000 pengudah bulih siti midul pirak enggau siti engkeraju lalu Angeline Melissa Lawas nerima RM2,500 asil ari siti midul pirak enggau siti engkeraju ti diulih iya.
Atlit bukai iya nya Siti Zubaidah Puini enggau Bryan Junency Gustin bela nerima insentif RM2,000 pengudah bulih siti midul pirak.
Udah nya, Wiro Julin, Tomson Lim Kok Hong enggau Catalina Sunti David Diok bela nerima insentif RM1,000 siku berindik ari penyulut seduai.
Pengari main bol bangku ruda, Freday Tan nerima RM200 pengudah mantu tim sida ngulih midul engkeraju.
Fatimah madah, atlit Sarawak mujur bulih 38 midul nyengkaum 13 midul emas, 14 pirak enggau 10 engkeraju ungkup kontinjen Malaysia.
“Kontinjen Malaysia bulih 201 midul nyengkaum 64 midul emas, 64 pirak enggau 73 engkeraju.
“Penyulut tu asil pengeransing, pengepuh, pengeliat ati, disiplin tinggi enggau semangat besai bala atlit.
“Pia mega, penyulut tu berindik ari embing enggau latih ti dipejalaika jurulatih,” terang iya.
Bela datai, dua Sapit Menteri Pemansang Indu, Nembiak Mit enggau Pengelantang Komuniti, Datuk Mohammad Razi Sitam enggau Datuk Rosey Yunus, Sapit Sekretari Perintah Sarawak (Administrasyen) ti mega Sapit Chairman Komiti Penyangga Penusah Nengeri Sarawak (JPBNS), Datuk Felicia Tan Ya Hua. – EDISI UKAS
