30 anak Sarawak nguji niki Gunung Fansipan

KUCHING: Urung 30 anak Sarawak ari Kelab Kembara Anak Sarawak deka nguji ngindikka kami ba tuchung Gunung Fansipan ba Indo China berengkah pagila..

Entara anak Sarawak ke nyereta pengawa niki bukit tu iya nya Evelin Ruman, Mohamad Zamahari Abdullah, Sri Amira Marset, Antonia Antonios, Mohd Khir Johari, Cynthia Francesca Biren, Madeline Ayom, Suriani Abd Latif, Nurul Aleena Ruman Abdullah, Dr. Sara Azreen Azizul Rahman, Nurul Aini Mohamed Rosdi, Danny Jabing, Francis Dick, Dr. Hanif Suffian, Hj Mazlan Mohd Salleh, Lelawati Othman, Najib Jeman, Abg Arman Abg Ismail, Abd Aziz Drahman, Dyg Shamsinar Abg Shamsuddin, Dr. Dyg Elena Maria Abg Draup, Fadilah Jais, Kannan Muniandi, Liam Belarek Bagly, Liyana Nabila Latif, Normala Suliaman, Lucy Hosea Drang, Catherine Saman enggau Jessica Ayom.
Kenyau ari kemari semua kaban Kelab Kembara Anak nya udah datai ba mengeri Hanoi, Vietnam lalu deka nguji nempa sejarah ungkup diri.

Presiden Kembara Anak Sarawak, Yusuf Buji madah raban sida bekejang ari Padang Bilun Entarabansa Kuala Lumpur (KLIA) urung pukul 6.10 pagi nuju Noi Bai Hanoi Vietnam.

“Raban ti nyereta pengawa tu betubuh 30 iku nyengkaum aku, dipelaba berengka niki bukit kena 28 Julai ari Lao Cai Sapa Valley.

“Ekspedisi serak tu bebida enggau sebedau tu laban gaya geografi sereta tanah Indo China renjan, mayuh batu enggau bisi tangga asal ari batu empu meri pemar ngagai kami,” ku iya madah ngagai Suara Sarawak.

Tandu iya pekara lebih ngasuh gagit laban ari tuchung bukit tu ulih endur meda pemanah rampa menua nengah peninggi 3,143 meter ari mua tasik.

Yusuf ngarapka ekspedisi Kelab Kembara Anak Sarawak serak tu lebih mujur lalu ulih meri peransang ngagai kaban kelab awakka nyereta mayuh agi pejalai ke lebih manah dudi hari diatur Kelab Kembara Anak Sarawak.

Dulu ari tu Kelab Kembara Anak Sarawak kala ngelawa mayuh bengkah palan ke manah mai kaban kelab sida baka niki Gunung Kinabalu, Gunung Trusmadi, Gunung Serapi, enggau Gunung Gading.

Kelab Kembara Anak Sarawak tu udah direjista ba Opis Pengerejista Gerempung (ROS) ba taun 2014.

ARAPKA MUJUR…Urung 30 anak Sarawak ari Kelab Kembara Anak Sarawak begambar kena sebedau bekejang ari KLIA ba pejalai niki Gunung Fansipan berengkah pagila.