PEMANAH rampa menua, peneleba ngatur kem entukar besai ba tebing sungai sereta penyelai adat enggau budaya komuniti Iban nyadi pekara pematak raban program Sarawak Interior Experience (SIE) di Ulu Entabai 2026 ti diatur ba Rumah Sang, Ulu Entabai, kena 24 ngagai 24 Oktober tu tadi.
Program ti diatur begulai Koperasi Bintang Tujuh Sarawak Berhad (KB7) enggau Kelab Lumba enggau Main Entukar 4×4 Peneresa Rampa Menua (PRM 4×4) mujur ngempuruka 60 buah entukar nya, ti ngaul 11 buah genturung pendiau rumah panjai sereta matak penatai lebih ari 600 iku tem uai ngagai Konsert Under the Stars.
Pengawa ngatur program tu ukai semina nyadi palan betemu sereta begempuru aja, tang mega muka peluang ngagai bala tem uai nemuai ngagai pemanah kandang menua Sarawak ti kaya enggau pengeraja sereta pesaka asal.
Pengerami bejadika program nya dipenyadika penyandang Kunsil Nengeri (DUN) Meluan, Datuk Rolland Duat.
Sekumbang program nya diatur, bala penyereita bepeluang ngasai ka pemanah rampa menua Ulu Entabai nengah aktiviti di sepanjai jalai sungai seraya ngelala rampa menua asal ti ngasuh temegah ati komuniti menua nya.
Bala tem uai mega diberi kelala pasal Sistem Tagang Ikan Semah, iya nya chara ngintu pengeraja asal berikan ti ngayanka pengeransing komuniti menua nya ngaga pemaik rampa menua unkup pemaik begulai.
Penyelai pesaka asal komuniti Iban mega dikelala nengah pengawa asal miring, naku Knyalang enggau naku antu pala ngambika ulih meri peneleba budaya ti besai reti ngagai pesereita enggau tem uai.
Kelimpah ari nya, palan bejual keresa pesaka ti mandangka bechamah asil krafjari menua mega bisi diatur dia.
Bala tem uai diberi kelala meda kreativiti enggau pengelandik komuniti sida nyaga pesaka asal unkup pemaik rebak dudi.
Program tu mega mai pemaik ngagai komuniti nengah sekeda servis bukai baka servis pengerai ti disediaka Palan Perubat KPJ Sibu, seraya Gerempung Penchereta Sarawak (SSA) bejalaika aktiviti bechetria dikena meri kelala jerita lama enggau pesaka asal menua tu.
Pengawa ti diatur ngaul Universiti Malaysia Sarawak (UNIMAS) mega bisi digaga unkup sukut dokumentasyen enggau pansik dikena nambahka pengulih ngerikod pengeraja asal enggau budaya Ulu Entabai ngambika bisi dikena bala nembiak jemah ila.
Program tu keterubah dipunka enggau Konsert Under the Stars ti mantai ka pengerichah pemerindang ari raban artis tebilang menua baka Melissa Francis enggau Depha Masterpiece ti lalu ditangkan enggau pengawa nyabut tikit benasip udah nya.
Kelimpah berindang bala temuai bepeluang ngerapika kaul entara bala penyereita, pengatur enggau komuniti menua nya.
Presiden KB7, Ellis Sebai Bandak madah, pengawa ngaul komuniti baka tu nyadi pelasar ti beguna dalam ngatur SIE dikena ngerapika kaul entara tem uai enggau komuniti, kelimpah ari ngelakuka penyelai budaya enggau pemanah rampa menua pesisir di Sarawak.
Berebak enggau nya, Presiden PRM 4×4, Presley Peter meri besai terima kasih ngagai raban pengatur, bakh strategik, komuniti rumah panjai, ejensi ti bekaul enggau semua penyereita laban udah meri sukung enggau kerejasama ngemujurka program nya.
Ku iya, sukung ari semua kelebih agi bala penyereita ti datai limpang sereta ngena perengka pengangkut sida empu nyadi kebuah besai ngagai pemujur pejalai program nya nyapai juluk.
Raban pengatur nangkan nya mega ngarapka SIE ulih diteruska nyadi pengerami ninting taun awakka ulih ngelakuka dagang temuai dalam menua, ngetanka pesaka asal komuniti sereta meransang pemansang ekonomi menua tu.
Mensia mayuh mega dipinta nitihka pemadah rasmi ari sida ngambika berita pemadu baru ulih dipadahka ngagai semua nengah tusun pejalai SIE ti deka datai.
