SPAOH: Bala Tuai Komuniti enggau Tuai Raban Bansa (KMKK) dipinta ngena pemintar runding enggau berani nyerungkai peluang baru ngadu pemansang Spaoh nipak ubah dunya.
Sapit Premier Sarawak, Datuk Amar Douglas Uggah Embas madah, Spaoh ulih mansang agi bepun ari saup rayat sereta kerejasama entara ejensi perintah enggau tuai komuniti.
Ku iya, Spaoh bisi pengelebi nengah pemansang strategik baka Stolport Bebuling, Agropark Bebuling enggau Palan Ngumpul, Nginjin enggau Nungkus (CPPC) Bebuling ti deka nyendia mayuh peluang ekonomi ngagai rayat di menua nya.
“Reti iya, menua kitai di Spaoh ditu majak mansang ari macham engkau tuai komuniti.
“Nya alai, aku minta KMKK semampai pintar runding enggau ngena penemu chakah ngemansangka diri enggau membidik redak dipegan sida,” ku iya.
Uggah nibarka jaku nya lebuh bejadika Pengerami Makai Lemai Serimbai Pengerami Tanglung Taun 2026 ba Balai Komuniti Spaoh, malam ensanus.
Iya madah, projek ngaga Jematan Paku tembu digaga ti nyambung pelilih mit Spaoh enggau Pasar Betong deka ngemanahka agi sistem jalai menua nya.
“Infrastruktur jalai meruan ti deka mai pemaik enggau pengelantang nyengkaum ba ekonomi rayat mayuh.”Nya alai aku minta ejensi perintah, bala KMKK enggau rayat sama ngena pemintar runding nyengkaum ngadu mayuh agi program ke ulih matak penatai temua sereta nyungkah ekonomi menua tumbuh meruan,” ku iya nyemetak.
Bela datai, Residen Bagi Menua Betong, Datu Richard Michael Abunawas; Chairman SUPP Saribas, Datuk Liam Kian Chun; Sekretari Politik Premier Sarawak, Roseline Mapong sereta bala bukai. -EDISI UKAS
