SPAOH: Bisi 350 peranak sitak Bukit Saban diatu berasai lantang lebih nerima Surat Pala Tanah Seksyen 18 Kanun Tanah Sarawak.
Surat pala tanah nya meri jamin ngagai hak ngempu tanah ti diaku nengah undang-undang ngagai bala penerima.
Pengawa nya udah dipenyadika Sekretari Politik Premier Sarawak, Roseline Mapong, ti ngarika Sapit Premier Sarawak, Datuk Amar Douglas Uggah Embas ba Balai Komuniti Spaoh, empai lama.
Penguasa Tanah enggau Survey Bagi Menua Betong, TPR. Moris Nyauq madah, bisi 488 lot tanah majur disukat chara individu ba sitak Bukit Saban, ngaul semua pemesai urung 929.7 hektar tauka 2,297.3 ikar.
Pengawa sehari nya mungkur enam sitak, iya nya Ulu Bayor Rimbas, Ulu Rimbas Asal enggau Baru, sitak Inar, Ulu Paku, Kampung Hulu Spaoh sereta sitak Ulu Paku nengah Projek Pemungkal Jubilee Occupations Ticket (JOT).
Moris madah, Opis Tanah enggau Survey (JTS) Bagi Menua Betong udah bejalaika dua projek pemungkal ba sitak Bukit Saban, iya nya meri surat pala tanah ngena JOT sereta nyukat tanah Adat Bansa Asal (NCR) ngena chara Hand-Held GPS dikena ngerembaika pengawa nyukat tanah ba menua nya.
Berebak enggau nya, iya ngelalau bala penerima ngena manah tanah sida nyadi reta berega ti bisi pengulihka mansutka asil ngagai diri sebilik nengah aktiviti ekonomi enggau komersial.
Ba projek pemungkal nyukat ngena chara Hand-Held GPS, bisi 17 sitak udah dikelala.
Ari penyampau semua tanah 2,391.17 hektar pemesai, bisi 578.2 hektar ngaul 549 lot udah disukat, seraya 303 lot udah diberi surat pala tanah ngena Seksyen 18 Kanun Tanah Sarawak.
Seraya projek pemungkal JOT ngerikod 152 lot dikelala, lalu 77 lot ngaul pemesai 101.4 hektar udah diberi surat pala tanah ngena seksyen ti sama.
Bela datai, Residen Bagi Menua Betong, Datu Richard Michael Abunawas; Pegawai Pemansang Zon Opis Nengeri Sarawak, Radiah Muhamed@Muhamad; Pegawai Pelilih Betong, Laga Kueh; Injinir Bagi Menua JKR Betong, Jason Ng Boon Tuan; Setkretari Kaunsil Pelilih Betong, Lister Clement Guwie sereta Pegawai Tadbir Mega Pelilih Mit Spaoh, Denny Lim. – EDISI UKAS
