SRI AMAN: Kompleks Lumba Sri Aman kemari richah laban mensia mayuh udah belabuh ngelawa Program Sarawakku Sayang (SKS) Sri Aman ti diatur tiga hari berunggu berengkah 30 Oktober ngagai 1 November.

Program ti ngempung mayuh ejensi perintah nya bisi nyendiaka servis enggau betemu mua terus ngagai mensia mayuh.

Sama bisi datai ngerichah program nya kemari, Sapit Menteri Dangang Temuai, Industri Kreatif enggau Seni Pemerindang Sarawak, Datuk Snowdan Lawan ti datai ngabas program nya seraya berandau enggau bala mayuh.

Penatai iya disempulang Sapit Sekretari Perintah Sarawak (Administresyen), Datuk Felicia Tan; Residen Bagi Menua Sri Aman, Mahra Salleh enggau Chairperson Kaunsil Pengintu Pengelantang enggau Lumba Raban Perintah Sarawak (MAKSAK) Raban Indu Sarawak, Datuk Baduyah Bujang.

Program SKS bela dirichah enggau Sri Aman Kitchen ti mandang bechamah bansa pemakai enggau produk ari orang dagang menua nya.

Snowdan mega bisi ngena awak nya nguji manduk bubur bisa begulai enggau MAKSAK Raban Indu Sarawak.

Mensia mayuh ti bisi datai ukai semina bepeluang meda program pemandang enggau servis tang mega diberi awak ngambi bagi ba sekeda program bukai nyengkaum beperingdang enggau pengerami budaya.- EDISI UKAS