KANOWIT: Pengawa bejalai beraban Niti Daun ti keterubah diatur ditu nyadi pematak besai serimbai Kanowit Cultural Festival 2026 (KCF 2026) lalu mandang pengelain ngagai festival ti diatur sepanjai Mei tu ba Tebing Ai Kanowit.
Pengawa ti diatur kena 8 Mei nya deka ngempuru entara 700 nyentuk 1,000 penyereta ari 37 kontinjen ngaul opis perintah, ejensi peribit, gerempung ukai dikuasa perintah (NGO), sekula sereta komuniti rumah panjai.
Pengawa bejalai beraban tu ukai semina mandang pengelain pesaka asal tang mega nyadi panggau ngayan identiti budaya komuniti.
Pegawai Pelilih Kanowit, Cerisologo Sabut madah, pengawa nya chara tumu dikena nyagu penyelai pesaka asal sebedau dikerembai ngagai komuniti luar dudi hari.
Ku iya, timbal tumu ngagai KCF 2026 chukup manah enggau penatai pengusung ke Bazar Gawai manggai entara 1,000 nyentuk 2,000 iku ninting hari kenyau ari hari keterubah diatur.
“Nya kebuah, kitai pechaya festival tu ulih matak entara 25,000 nyentuk 30,000 pengusung belabuh ari 1 nyentuk 28 Mei,” ku iya pengudah betuai ke Aum Komiti KCF 2026 1.0 di Opis Pelilih Kanowit, Hari Satu tu tadi.
Ku iya, bisi 50 bansal Bazar Gawai udah diudar pedagang lalu mandangka pengandal komuniti ngagai pengulih festival nya nyadi pelasar nyungkak ekonomi.
Kelimpah Pengawa Bejalai Beraban Niti Daun, bemacham aktiviti narit ati mega ditusun sepanjai festival baka Pekit Ai Tuak diatur kena 16 Mei ti mandangka pekit kualiti tuak pemadu manah enggau pengulih ngambi dikomersial.
Festival tu mega richah enggau pekit KCF Idol belabuh ari 17 Mei tu dikena ngansah penau baru ba bidang belagu kelimpah main asal baka ngajat enggau betabuh.
Nangkan nya, Pekit Kumang KCF kena 23 Mei disadang nyadi siti ari pengawa ti dianti lalu deka dipenyadi Sapit Menteri ba Opis Premier Sarawak (Undang-Undang enggau Adat Bumiputera), Datuk Jefferson Jamit Unyat.
Cerisologo nyemetak madah, pengawa ngatur KCF ukai semina pengawa pemerindang tang mega dikena nyaga sereta nyagu pesaka budaya menua seraya ngelakuka nya nyadi produk dagang temuai.
Festival tu mega dipeda nyadi pelasar negut penyerakup enggau pengelantang komuniti pupu bansa nengah kerejasama komuniti.
Pengerami nutup KCF 2026 1.0 deka diatur kena 24 Mei tu lalu deka dipenyadi Menteri Penyerakup Bansa ti mega Kaban Parlimen Kanowit, Datuk Seri Aaron Ago Dagang.
