KUCHING: Bisi 39 ari 135 iti jematan ke digaga nengah Program Tranformasyen Menua Pesisir (RBTP) udah tembu, lalu 31 iti agi benung digaga.
Sapit Premier Sarawak Datuk Amar Douglas Uggah Embas madah, program ke beungkus RM400 juta nya deka dipajakka dikena ngadu enggau nganti jematan mit lebih agi ba sepemanjai jalai batang lama.
“Perintah ransing ngaga jalai di menua pesisir nengah RBTP ngadu sereta nganti jematan mit ba sepemanjai jalai batang suba,” pia ku iya.
Iya madah munyi nya maya ngenataika jaku simpul ari opis menteri iya ba Aum Kunsil Nengeri (DUN) Sarawak Ke-19 ditu, Hari Tiga.
Kelimpah ari nya ku iya, 17 iti jematan diatu ba renggat tender lalu 48 iti agi benung ba renggat prakontrak.
“Ari semua 135 iti jematan nengah program RM400 juta tu, 39 udah tembu, 31 iti benung digaga lalu 17 ba renggat tender enggau 48 ba renggat prakontrak,” ku iya nerang.
Tuju program nya digaga dikena nyendia jalai ke manah agi ungkup rayat menua pesisir lebih agi ba sida ke agi ngena jalai batang. — EDISI UKAS
