MIRI: Bisi 5,609 kes bebadi ba jalai dirikod di Sarawak ungkup timpuh Januari nyentuk March 2026.
Menteri Pengangkut Sarawak, Datuk Seri Lee Kim Shin madah, nya ti ngasuh kitai irau ke tikas pengelikun penguna jalai ba nengeri tu.
Ku iya, ari penyampau nya, bisi 99 kes ngaul kes bebadi nyawa ti ngujungka 107 kes pemati.
“Pia mega, 30 kes bakal dirikod ke alai 39 iku balat bakal lalu 69 kes enda balat bakal ke alai 87 iku bakal.
“5,411 kes nya kes aksiden jai entukar,” ku iya lebuh Kimpin Pengelikun Jalai diatur Endaya Construction Sdn Bhd ba stesyen minyak di Pujut, Hari Satu tu tadi.
Iya madah baru, Miri ngerikod 1,165 kes aksiden ungkup timpuh Januari nyentuk April 2026, nambah empat peratus dibanding 1,120 kes ba timpuh sama taun nyin tadi.
Lebih ngirauka ati, ku iya, penyampau kes bebadi nambah ari 14 ngagai 19 kes lalu kes pemati nambah ari 15 ngagai 20 iku, nambah lebih 30 peratus.
Entara endur dikelala bisi risiko nyengkaum Jalai Miri By-Pass, Jalai Kuala Baram By-Pass, Jalai Persisiran Pantai, Jalai Besai Pan Borneo sereta Jalai Miri–Airport. Sekeda tumpuk angat mega dikelala baka Jalai Beraya, sekeda Jalai Besai Pan Borneo di Suai sereta Jalai Miri By-Pass ari Emart Riam ke simpang Jalai Tanjung Batu.
Ku iya, pun penusah aksiden tau nyadi ketegal pengilap deriba, jalai enda landai sereta lampu jalai enda terang.
“Sukut pengelikun jalai ukai semina bepanggai ngagai pengawa nerit atur tang mega ngaul pengawa nyendia infrastruktur ti likun sereta ulah penguna jalai,” ku iya. – EDISI UKAS
