KUCHING: Bisi 60 tuai ruang bilik kurang penatai pemisi di sitak Stakan nerima bantu pemakai serimbai pengawa ngintu genap taun ke-10 Stesyen Minyak PETRONAS Stakan pagi tadi.
Program meri bantu nya diatur raban Serikat Kos Synergy nengah kerejasama Palan Servis Kaban Kunsil Nengeri (ADUN) Stakan.
ADUN Stakan, Datuk Hamzah Brahim ti nyadi temuai dipebasa ba program nya madah, bala penerima bantu nya datai ari enam genturung pendiau.
Iya madah, nya nyengkaum Kampung Bukit Berangan, Sungai Pendam, Sungai Empit, Merdang Gayam, Pangkalan Kuap enggau Stakan Melayu.
“Sehari tu, kitai bisi ngatur siti program meri bantu ngagai 60 peranak ditu dikena ngelempung tating belanja sida.
“Bantu berega RM100 siti tu mungkur bantu berau, minyak makai, gula, pemakai dalam tin enggau mi,” ku iya ba program nya.
Nangkan nya, Menijar Stesyen PETRONAS Stakan, Khairunnizan Othman madah, program nya ukai semina dikena mantu raban ti begunaka bantu aja tang nambah pengeleda komuniti pasal tanggungpengawa sosial sida.
Nengah kerejasama nya, iya ngarap nya ulih meri inspirasyen ngagai raban bekaul ngaul diri ba aktiviti komuniti.
