NGEMAH: Sepenyampau 69 nembiak nyulut Sijil Pelajaran Malaysia (SPM) 2025 ari sitak Kunsil Nengeri (DUN) Ngemah nerima insentif pelajar penyampau RM20, 700 kelai puji enggau peransang terus nyapai pemujur.
Kaban Kunsil Nengeri (ADUN) Ngemah, Anyi Jana madah, insentif nya diberi ngagai genap nembiak ke bulih pemutus 3A enggau mayuh agi ke nerima RM300 siku, kelimpah ngemendarka bantu bukai ngagai sida ke nampung pelajar ngagai palan pelajar tinggi.
“Kena manah peluang ke bisi ngulihka pengidup menyana dudi hari. Enti bisi perambu nampung pelajar ngagai tikas tinggi agi, pilih bidang ke endang dikerindu enggau bisi peminta ke manah ba makit kereja,” ku iya.
Anyi nibar ke jaku nya ba mua mayuh rambau Pengawa Nyua Insentif Pelajar SPM 2025 di Opis Palan Servis Parti Rayat Sarawak (PRS) Ngemah ditu, empai lama.
Iya madah baru, nembiak ke nampung pelajar ngagai tikas diploma deka nerima bantu pelajar penyampau RM500 siku, seraya sida ke mujur nampung pelajar ngagai tikas degree deka nerima RM1,000 siku.
Iya mega bekunsi peneleba diri lebuh ngiri penemu enggau gawa nyadi pengajar sebedau diberi pengandal nyadi pengari rayat.
“Pemujur diulih sehari tu asil ari pengepuh, disiplin sereta pengeransing ngulihka juluk ati.
“Dikearap cherita pejalai idup tu ulih nyadi peransang ngagai rebak biak ransing agi ngulihka pemujur ba bidang akademik enggau kereja dudi hari,” ku iya.
Seraya tujuh penerima datai ari nembiak nyulut bulih 7A, iya nya Nisa John, Charmelin Gerina Naong Marcus, Lydia Nia Melia, Deana Bestrisya Jes, Felecia Jelembai Jack, Jackline Martin enggau Doniefer Gindy Wilson. – EDISI UKAS
