SERIAN: Ungkup bansa Dayak ba Kampung Ta-ee, Serian, pengawa Birarak Gawai ukai semina pengerami ke diintu ninting taun ke richah ngena ngepan asal enggau muzik bansa, tang mega nyadi keresa pesaka adat ke terus ditan nyadika identiti komuniti nya kenyau ari taun 1970.
Kampung Ta-ee ke penyauh kira-kira 60 kilometer (km) ari Bagi Menua Kuching terus ngetanka adat ke udah diintu pengelama 56 taun ngambika mengkang meruan idup.
Kena 1 Jun tu tadi, kampung nya richah amat laban bisi digulu beribu iku mensia mayuh, raban temuai sereta peranak menua nya ke begempuru ngulu Program Bejalai Bebala Mayuh Birarak Gawai Ta-ee 2026.
Program ke endang dianti-anti nya diatur dikena ngerami pengaya pesaka asal, main asal, enggau penyerakup raban bansa Bidayuh.
Dituku nyadi siti ari pengerami Gawai Dayak ke pemadu richah diatur peranak Pelilih Serian, program ninting taun tu ngubah genturung pendiau nya nyadi panggau budaya.
Pengawa nya mandangka perengka pengangkut ke dilagu enggau manah, ngepan tuai bansa Bidayuh, tanda asal, muzik sereta penaluk peranak menua ke sama ngerichahka pengerami nya.
Taja pia, utai ke ngasuh pengerami nya balat agi richah iya nya pemanah semengat enggau ulah peranak menua dia.
Tiap buah rumah ke bisi dipansa sepemanjai jalai Program Bejalai Bebala Mayuh nya seruran nyambut penatai temuai ngena mayuh macham pemakai asal enggau ai irup, ke ngasuh semua pengabang ke datai chukup gaga ati.
Pengerami tu dirichah agi enggau penatai Kaban Parlimen Serian, Dato Sri Richard Riot JaemKelimpah ari nya, pengerami taun tu mega nerima sukung ke manah ari raban korporat enggau raban bukai ke sama nyaup ngemujurka pengawa nya.
Chairman Komiti Pengatur Gawai Ta-ee, Dr Christopher Kiyui, ngarika komiti meri terima kasih ngagai semua piak ke bisi melanja, bala bakih, raban voluntia, peranak menua sereta mensia mayuh ke bisi datai ngerichahka pengerami taun tu.
“Kami beterima kasih amat ngagai sukung ke diterima ari semua piak.
Pemujur pengawa bejalai bebala mayuh ninting taun tu mandangka penyerakup kitai ba pengawa nyaga sereta mantaika budaya enggau adat asal Bidayuh ungkup rebak dudi,” ku iya.
NYULUR ADAT ASAL
Pengawa birarak ke diatur ninting taun tu seruran digulu bemacham rebak bansa nyengkaum raban orang tuai nyentuk sida rebak biak.
Ku Malvern Lister, 42, adat birarak nya terus idup sereta terus dipeturun ngagai rebak dudi laban dua iku anak iya diatu mega bisi ngambi bagi ba pengawa nya.
Iya empu berengkah enggau pengawa pengerami Gawai Dayak kenyau ari umur 10 taun.“Kami sebilik, nyengkaum apai enggauindai aku, suba mega kala sama enggau pengawa birarak tu.
Diatu, dua iku anak aku mega ngambi bagi.
Reti ya, bisi tiga rebak peturun kami sebilik udah sama beserakup ngemujurka pengawa tu.“Aku arapka sida terus ngetanka adat tu ngagai jemah ila.
“Kami temegah ati laban mengkang ulih ngatur pengawa birarak tu ninting taun. Kami mega arapka mayuh agi pengabang datai ngagai Kampung Ta-ee ngambi sida ulih ngelala adat asal enggau pesaka bansa Bidayuh tu,” ku iya.
Adat ke ngerapit kaul enggau pengawa ngetau padi, Malvern madah, pengawa birarak nya endang bisi kaul enggau adat ngetau padi.
Taja pia, pengawa nya ukai semina pengerami ninting taun aja tang mega meri awak ngagai peranak menua nya begempung sereta ngerapatka kaul entara rebak tuai enggau rebak baru.
Semengat ke sebaka mega dikunsika McWilkins Benadik, 33, ke enggau bejalai ba pengawa birarak sepemanjai lima kilometer ngelingi kampung nya nyadi pelasar ke beguna amat dikena mantaika adat asal raban bansa Bidayuh Bukar ngagai menua luar.
Kampung Ta-ee ninting taun seruran nerima pengabang ari dalam enggau luar menua ke deka meda kediri empu chara bansa Bidayuh Bukar ba Serian ngerami Gawai Dayak.
“Pengawa tu ukai semina nyaup mantaika adat asal kami ngagai menua luar, tang mega meri penguntung ngagai sektor dagang temuai enggau ekonomi komuniti ba menua tu,” ku iya.
PENGABANG MENUA LUAR
Pengerami taun tu mega balat narit ati mensia mayuh, nyengkaum bala pengabang ari menua bukai baka China, Kanada, United Kingdom enggau Amerika Syarikat.
Penatai pengabang ari menua luar tu mandangka pengerami Birarak Gawai Ta-ee nyau majak dikelala orang luar, ukai semina ba Sarawak aja.
Aaron Richards, 42, ari Amerika Syarikat ke gawa ba Kuala Lumpur madah, tu meh keterubah iya datai ngulu pengerami Gawai Dayak.Iya nemuai ke Sarawak enggau pangan indu iya ke bansa Bidayuh sama begulai ngerami Gawai enggau diri sebilik pangan iya nya.
“Tu keterubah aku enggau pengerami baka tu. Aku gaga amat ati ulih meda adat asal ba menua tu sereta begulai enggau peranak menua tu,” ku iya.
James Handfield-Jones ari United Kingdom mega bekunsika pengagit ati iya ngagai adat asal negeri Sarawak.
Pengudah diau ba Sarawak lebih dua puluh taun, iya madahka adat asal Tanah Kenyalang terus nyadi siti ari utai ke ngasuh iya rindu deka ngambi bagi dalam bemacham pengerami ngintu Gawai Dayak.
MANDANG PESAKA BIDAYUH
Pengerami ke diatur Komiti Pengatur Gawai Ta-ee begulai enggau JKKK Kampung Ta-ee deka terus nyadi pelasar ke badas dikena ngintu enggau nyaga adat sereta pesaka asal bansa Bidayuh ke alai pengerami taun tu ngempuru ke kira 3,000 iku temuai enggau pengabang.
Kelimpah ari bejalai ngelingi kampung, bala temuai mega ngetu ba palan endur begulai randau enggau peranak menua nya sereta nguji bemacham aktiviti adat asal ke nyadi sebagi ari pengerami nya.
Pengawa nya mega nyaup ngemansangka dagang temuai sereta ngerapitka kaul rayat di Sarawak enggau menua bukai.
Birarak Gawai Ta-ee deka terus diatur ninting taun dikena mandangka pesaka asal bansa Bidayuh peranak menua nya meruan idup, taja pan napi ubah dunya enggau pemansang moden.
