BINTANGOR: Ulah kerejasama peranak sekeda rumah panjai dalam nagang pengerekai penyakit Covid-19 ba peliluh tu nerima puji Adun Meradong, Datuk Ding Koung Hiing.
Iya madah, inisiatif peranak rumah panjai ti masang papan tanda nagang penatai orang luar ketegal pengerekao pandemik baka nya endang disukung.
Berebak enggau nya, ku iya atur baka nya chukup manah dikena nentuka pengelikun kelimpah dikena nentuka semua raban semampai bejejaga.
“Kerejasama peranak rumah panjai endang beguna amat dikena mulaika baru pemanah menua enggau mutuska rantai penyakit Covid-19.
“Kitai ngarapka pengawa manah nya ulih terus dikereja peranak rumah panjai ba pelilih tu,” ku iya maya ngabas sitak menua ke dijaga iya, kemari.
Ding mega ngelalau peranak rumah panjai terus ngemeranka daya idup baru iya nya nitihka Atur Pengawa Standard (SOP) ke udah ditetapka perintah.
Pia mega ku iya, pengawa nitihka SOP enggau daya idup baru nyengkaum patut ngena sengkabung mua enggau nyaga takah ari pangan diri mesti dititih.
“Tu beguna amat dikena nentuka menua tu ulih pulai manah baka selama lalu kitai ulih bejalaika pengawa baka selama. Aku mega ngelalau rayat seruran bejimat lalu anang enda beratka pangka pengerekai Covid-19 tu,” ku iya.
Nangkan ke nya, kluster Mador, Meradong nadai ngerikodka sebarang kes baru nyentuk Hari Lima tu tadi lalu penyampau kes agi mengkang lapan kes.
Urung 1,238 iku orang udah diperesa lalu ari penyampau nya, 1,230 negatif.