KUCHING: Projek Kampung Digital Sungai Asap (SADV) ti ngaul pengawa ngelekat tali gentian optik sepemanjai 140 kilometer di Sungai Asap enggau Apau Koyan diatu udah manggai 89 peratus lalu dipelaba tembu semua ujung taun tu.
Sapit Menteri Utiliti enggau Telekomunikasyen Sarawak, Datuk Liwan Lagang madahka projek nya dipelaba ulih ngedutka takah digital sereta nyungkak penyulut sosio-ekonomi komuniti menua ngena agih belanja penyampau RM36.18 juta.
“Projek SADV tu sebengkah projek ti dipelanja penuh Perintah Gempung Parti Sarawak (GPS) Sarawak, taja telekomunikasyen dalam bidang kuasa perintah besai,” ku iya.
Liwan bejaku munyi nya lebuh nyaut tanya Kaban Kunsil Nengeri (ADUN) Murum, Kennedy Chukpai Ugon ba Aum Kedua Penggal Kelima Kunsil Nengeri (DUN) Sarawak ba Kompleks DUN ditu, tadi.
Ku iya, pengawa bejalaika projek nya dipelaba deka meri pemaik ngagai urung 20,000 iku peranak ari 16 genturung pendiau, ti ngaul 117 buah rumah panjai ngelingi Sungai Asap enggau Apau Koyan.
Iya madah, inisiatif SADV nya meransang pengawa ngena teknologi moden dalam pengawa betanam betupi pintar, ngemuntangka pengawa ngena servis e-banking, ngelakuka aktiviti e-dagang ngagai orang dagang menua pesisir sereta ngangkatka kualiti pelajar digital raban nembiak sekula.
Kelimpah ari nya, Liwan madahka projek nya mega ngemuntangka akses ngagai servis digital perintah sereta nyungkak dagang temuai nengah chara ngelakuka penyelai main asal etnik Sarawak ngagai renggat global.
