KUCHING: Kaban Kunsil Nengeri (ADUN) Padungan, Chong Chieng Jen diketuka ngulu aum DUN berengkah sehari tu nyentuk aum tembu kena 21 Oktober ila.

Speaker Kunsil Nengeri (DUN) Sarawak, Tan Sri Datuk Amar Mohd Asfia Awang Nassar madahka pemutus nya digaga pengudah langgur ngetuka iya diperunding sereta diundi.

Dulu ari nya, Menteri Pengangkut ti mega ADUN Senadin, Datuk Sri Lee Kim Shin mantaika langgur ngetuka Chong ti mega Chairman Parti Tindakan Demokratik (DAP) Sarawak ketegal iya nyukung penerang ti ngelanggar atur Dewan.

Lebuh mantaika pemutus nya, Asfia madahka langgur ti dibantaika Kim Shin dikemendarka pengudah nerima sukung 62 undi enggau semina siti aja undi bantah.

Kim Shin lebuh mantaika langgur madahka Chong bisi mansutka penerang ti sengaja ngelimpangka Dewan lebuh bejuraika Bajet 2027.

Ku iya, Chong suah ngena sereta nandu penerang enggau tuduh ti bedau ditukuka iya, tauka pemendar sereta pekara ti betul lebuh dipinta Speaker meri bukti ngenuku tauka justifikasyen lebuh bejaku.

Kelimpah ari nya, iya madahka Chong udah ngena jaku ti ngasuh ati nyima sereta ngelese bala ADUN laban ngena motif ti enda patut tauka nuduh sida.

“Genap iku Kaban Dewan tu bisi hak bejaku, betanya, mantaika penemu enti enda setuju sereta meresa pengawa perintah. Semua nya beguna ba pengawa demokrasyen parlimen lalu meseti dipebasa.

“Taja pia, hak tu mega datai enggau tanggungpengawa. Genap iku kaban enda tau enda nitihka Atur Dewan, bebasaka kuasa Speaker sereta bejimat lebuh mansutka penerang enggau tuduh dalam Dewan tu,” ku iya.

Nerang enggau silik agi, Kim Shin madahka langgur nya dibantai nitih Atur Dewan 32(4), 32(6), 32(10)(d) enggau 32(12) ti didawa udah dilanggar.