KUCHING: Pengawa ngintu, ngadu sereta nangkir Jalai Perintah Besai Balingian–Sungai Anak ti nyambung rentayan Jalai Besai Pan Borneo begunaka perati dikena nambahka pengelikun enggau pejalai perengka pengangkut ba kandang menua nya lanchar.
Kaban Kunsil Nengeri (ADUN) Balingian, Dr. Abdul Yakub Arbi madah, jalai nya bisi potensial nyadi jalai alternatif ari Balingian ke Bintulu, kelimpah nyadi jalai ditengah perengka pengangkut besai enggau perengka pengangkut industri.
Iya madahka pengawa nya beguna endar ngambi entukar besai enda kelalu betengahka jalai tebing tasik ti mega ngasuh jalai alun jampat jai sereta ngeruga pengelikun penguna.
“Aku minta pengawa ngintu, ngadu enggau nangkir Jalai Perintah Besai Balingian–Sungai Anak ti nyambung rentayan Jalai Besai Pan Borneo diberi perati manah,” ku iya.
Abdul Yakub madah munyi nya lebuh bejuraika Rang Undang-undang Belanja 2027 ba Aum Kedua Penggal Kelima Kunsil Nengeri (DUN) Sarawak Ke-19, kemari.
Ngenang pekara bekaul, iya minta Jalai Ulu Bayan digaga manah nengah pengawa nangkir jalai besai agi dikena nambahka pengelikun enggau lanchar pejalai perengka pengangkut.
Ku iya, gaya jalai kelalu mit begunaka perati ngambika penguna ulih nengah jalai nya enggau likun sereta lantang agi.
Iya ngarapka kededua perambu nya ulih diberi perati ba langgur pemansang jalai alun jemah ila dikena nangkup guna peranak enggau penguna jalai alun di kandang menua Balingian.
