KUCHING: Langgur ngemanahka Kompleks Imigresyen, Kastam, Kuarantin enggau Pengelikun (ICQS) Biawak agi dipansik nengah ‘feasibility study’ Pelin Besai Pemansang Kandang Menua Sarawak.
Menteri Dagang Temuai, Industri Kreatif enggau Seni Pemerindang, Datuk Seri Abdul Karim Rahman Hamzah madahka pengawa mansik pelin besai nya dipelaba tembu ujung taun tu.
“Perintah Sarawak deka meresa asil pansik sebedau nentuka ni bagi projek pemansang garis entara menua ti engkeman dipejalaika berenggat.
“Asil nya diperati bepelasarka pemereti, utai ti diguna sereta ti bisi disedia ngambika ulih dipejalai tang bepanggai ba agih belanja enggau pemendar ti bebekaul,” ku iya.
Abdul Karim bejaku munyi nya lebuh nyaut tanya Kaban Kunsil Nengeri (ADUN) Opar, Billy Sujang bekaul tikas langgur ngemanahka ICQS Biawak bekau ari penerang ti dibantaika Premier Sarawak rambau nangguhka Program Regata Batang Kayan ba Aum Kedua Penggal Kelima Kunsil Nengeri (DUN) Sarawak ba Kompleks DUN ditu, tadi.
Ku iya, pansik nya dipejalaika dikena nimbal guna strategik kandang adan menua Sarawak ti majak nambah, nyengkaum pemutus Indonesia ti mindahka indu nengeri ngagai Nusantara, Kalimantan Timur.
