KUCHING: National Geographic Learning nyukung inisiatif Perintah Sarawak ba agenda pelajar gadung enggau penemu bekaul ubah klimet.

Ku Direktor Kanan ti mega Tuai Ungkup Rantau Asia National Geographic Learning, Micheal Cahill, sukung nya bekaul pelajar STEM, teknologi enggau pemeruan rampa menua di nengeri tu.

Ku iya, sida diatu benung bekerejasama enggau bala pengajar sereta komuniti di selampur Sarawak dikena nambah penemu bekaul ubah klimet, pemeruan enggau pelajar gadung.

“Ba National Geographic Learning, tuju kami iya nya deka mai dunya ngagai bilik kelas enggau komuniti di selampur Sarawak.

“Seraya nya, kitai deka mai Sarawak datai ba renggat dunya,” ku iya.

Micheal bejaku munyi nya lebuh dirandau pemberita pengudah ngatur penemuai basa ngagai Premier Sarawak, Datuk Patinggi Tan Sri Abang Johari Tun Openg, ditu kemari.

Iya mega madah, sida bela ngelalu penatai Premier Sarawak nemuai ngagai indu opis National Geographic Learning di Amerika Syarikat enggau China ngambi ulih bekunsi pemujur Sarawak ngerembai penemu bekaul ubah klimet enggau pemeruan.

Nangkan nya, Direktor Pengatur National Geographic Learning, Charles Shim madah, sida udah ngatur program National Geographic Learning ba sekula di selampur Sarawak kenyau ari taun 2018 ari prasekula, sekula primari enggau sekula sekondari .

Ku iya, program nya kelebih agi bekaul STEM, teknologi enggau pemintar digaga (AI).

“Penatai kami sehari tu deka nerang ngagai Premier Sarawak bekaul nama ke udah digaga sereta pengulih nempa kerejasama enggau Perintah Sarawak dikena ngenegapka agi tikas pengulih belajar STEM kelebih agi ba bidang sains enggau teknologi,” ku iya .

Bela datai, Menteri Pelajar, Inovasyen enggau Pemansang Pengelandik Sarawak, Datuk Sri Roland Sagah Wee Inn enggau Sekretari Perintah Sarawak, Datuk Amar Mohamad Abu Bakar Marzuki. – EDISI UKAS