Agih khas patut mungkur Dayak

KUCHING: Komuniti Dayak di Sarawak enda patut tinggal dalam ngasaika Juluk Pengelantang Begulai, ku Kaban Parlimen Datuk Seri Richard Riot Jaem.

Ku iya, tikas penatai pemisi entara Bumiputera Dayak enggau Melayu ngembuan takah ti chukup besai.

“Enti sema Orang Asli dibantu Opis Pekara Orang Asli (JHEOA), komuniti India nerima agih khas beungkus RM170 juta, komuniti China diungkupka RM100 juta dalam Bajet 2021, nama kebuah agih khas enda diberi ngagai komuniti Dayak di Sarawak,” ku iya.

Riot madah munyi nya lebuh ngambi bagi dalam bahas renggat pelasar Bajet 2021 di Dewan Rakyat di Kuala Lumpur, kemari.

Iya ti mega Duta Khas Menteri Besai ngagai Asia Timur madahka, Perkeso udah mantu menua lebuh tikas ekonomi labuh berindik ari pengerekai igi penyakit Covid-19.

“Pengawa Perkeso mansutka duit di baruh Sistem Insuran Pengawa (SIP) tauka Employee Insurance Scheme (EIS) ngagai sida ti nyadi kaban KWSP udah mayuh mantu sida ke bekaul.

“Kelimpah ari nya, dalam Bajet 2021 perintah mega ngemendarka kaban KWSP ngambika ulih mansutka RM500 sebulan pengelama 12 bulan enggau penyampau RM6,000,” ku iya.

Nangkanka nya, iya madahka kaban KWSP minta ngambika penyampau RM6,000 nya dibayar lansam.
“Nengah penyampau RM6,000 nya, sida ulih bejalaika dagang mit baka muka palan bedaja kediri ba tisi jalai.

“Perintah patut berundingka peminta sida tu. Penyampau RM6,000 nya semina diberi ngagai sida ke kala minta aja,” ku iya.

Datuk Seri Richard Riot Jaem

Suara Sarawak