DARO: Program Betanam Betupi Ngaul Komuniti (AgriCOP) Nanga Semah nyadi pelasar nambah penemu enggau pengelandik peranak menua pesisir ba pengawa betanam betupi.

Kaban Kunsil Nengeri (ADUN) Daro, Dr Safiee Ahmad madah, nya dikena nambahka produktiviti, ngulihka belanja enggau nyukung pemansang sektor agropemakai ke meruan.

Ku iya, program nya mega ngayanka pengeransing Perintah Sarawak nambah kapasiti komuniti nengah latih teknikal enggau ngiri penemu teknologi betanam betupi.“Nengah AgriCOP tu, kitai ulih nambah penemu enggau pengelandik peranak menua pesisir ba pengawa betanam betupi.

“Tu beguna endur dikena nambahka produktiviti, ngulihka belanja enggau nyukung pemansang sektor agropemakai ke meruan laban peranak nyau bisi penemu sereta landik ngena teknologi,” ku iya.

Safiee nyebut jaku nya lebuh bejadika Pengawa Nangguh Program Betanam Betupi Ngaul Komuniti (AgriCOP) Nanga Semah di Rumah Lawrence Merka Jamba, ditu, empai lama.

Ku iya, pengawa negap komuniti nengah latih betanam betupi beguna endar dikena mantu peranak ngena manah pengulih tanah dikembuan sida enggau nemban agi.

“Kitai pechaya, enti peranak rumah panjai nyau dilatih ngereja pengawa betanam betupi ngena chara meruan, tu ulih mantu sida ngereja tanah ngena teknologi ti engkeman.

“Ari bekenaka teknologi, dia pengawa ba tanah deka nyamai agi dikereja kelimpah ulih nambahka asil kebun enggau tikas ekonomi ruang bilik sida,” ku iya.

Safiee madah baru, pemansang sektor betanam betupi ukai semina dikena nyamin bekal pemakai aja, tang nyadi penyungkak ekonomi menua pesisir tumbuh nengah asil produk bisi rega tambah sereta pengawa betanam betupi ke meruan.

Ke penemu, sepenyampau 56 penyereta ari Nanga Semah enggau Kampung Penasu udah ngulu latih teknikal ke mungkur kus nanam limau enggau ngaga sum organik sekumbang program nya. – EDISI UKAS