AgroBazaar Rayat Kena pengelebih dagang online

BETONG: Raban nembiak menua tu diperansang ngena penau enggau pengelandik sereta pengelebih makit dagang nyaup pemansang sektor betanam betupi enggau berikan.

Ku Kaban Parlimen Saratok Ali Biju, dudi hari kitai deka bejalaika makit kreatif agi ungkup raban diselinting nyual produk sida nengah online nunda pemujur dagang ba mengeri.

“Nya alai aku meransang raban nembiak ti bepenau enggau bisi pengelandik ngena arus penyambung numbuhka dagang chara online, produk ulih dijual terus ngagai penguna, enda ibuh begunaka orang tengah.

“Ambika chunto, hotel tebilang di Kuala Lumpur diatu ngena chara tu ngelakuka servis enggau produk disedia sida kelimpah ngemuntangka bala penguna ngaga pilih,” ku iya lebuh dirandau Suara Sarawak.

Ku iya, rega mega deka tinggi agi ari makit bepelasarka kualiti asil produk laban diambi sereta diinjin terus ari ladang lalu penguna bisi pengandal ba pekara pemeresi.

“Kitai mega beratika mensia mayuh diatu sedarka pemesai guna nyaga pengerai ari pemakai kelebih agi baka buah enggau sayur ti dijual terus ari ladang.

“Tu deka meri peluang ngagai pedagang baru nguji nyual produk betanam betupi enggau berikan terus ngagai penguna enggau rega ti patut,” terang iya.

Ali mansutka jaku tu lebuh dipebasa bejadika AgroBazaar Rayat seraya ngemata Pengawa Nyain Memorandum entara AgroBazaar enggau Fama Betong di Nyabor ditu, kemari.