KUCHING: Bisi 14 individu ditan ba bemacham penyalah bekaul dadah ba Op Tapis Khas ti dipejalai pengelama tiga hari ngelingi pelilih tu, ari 25 nyentuk 27 Oktober tu tadi.
Tuai Polis Pelilih Kuching, ACP Alexson Naga madahka operasyen ti dipejalai Indu Opis Polis Pelilih (IPD) Kuching nya mega mujur ngerampas 6.49 gram bahan dipelaba dadah bansa methamphetamine berega RM705.
“Ari 14 individu ti ditan, siku ditan nengah Seksyen 39A(1) Akta Dadah Berbahaya 1952, lalu empat da nengah Seksyen 12(2) akta sama,” ku iya.
Iya mega madah, semilan da ditan nengah Seksyen 15(1)(a) Akta Dadah Berbahaya 1952.
Ku iya, operasyen khas pengelama tiga hari nya mujur ngetan 14 individu ba bemacham penyalah bekaul dadah, kelimpah ngerampas dadah dipelaba methamphetamine berat 6.49 gram berega RM705,”terang iya baru.
Alexson madah, pemujur operasyen nya asil subuk raban polis sereta kerejasama mensia mayuh meri penerang bekaul penyalah dadah.
“Opis Pansik Penyahah Narkotik (JSJN) keran terus munaska dadah dikena nyaga rebak diatu enggau dudi hari.
“Dadah nya musuh lumur satu menua lalu pengawa munas penyalah tu beguna ke kerejasama ari mensia mayuh,” terang iya.
Berebak enggau nya, Alexson minta mensia mayuh meri sebarang penerang bekaul aktiviti nyual enggau salah guna dadah ngagai raban polis.
Penerang nya, ku iya, ulih dipadah nengah lumur hotline JSJN di 012-208 7222 tauka hotline JSJN Indu Opis Polis Kontinjen (IPK) Sarawak di 017-592 9211. – SYAMIMI HUSNA
