Ajar anak milih pemakai ti bepengerai

Malaysia nyadi menua ti kedua tinggi di Asia napi penanggul anak mit obesiti

KUCHING: Kurang penerang enggau pelajar nutrisyen pemakai ari apai indai entara kebuah bala anak nyadi gemuk tauka obesiti.

Nitihka Pansik Tabung Nembiak Mit Gerempung Bansa-Bansa Bersatu (Unicef) Malaysia nunjukka penanggul obesiti nembiak mit ba menua tu ti kedua tinggi di Asia pengudah Brunei.

Nurul Jamaludin, 32 taun ari Kuching ke mega nyadi kaban Gerempung Siru Indai Tunggal Sarawak madah, mayuh apai indai pabu penemu sentang penyampau nutrisyen pemakai ti patut diambi anak kelebih nutrisyen tusu ti diberi ngagai anak.

“Kekadang tusu ti diambi anak-anak ngundan mayuh gula ti ulih ngachau pengerai bukai kelimpah obesiti.

Nurul Jamaludin

“Entara penanggul pengerai ti deka ditapi anak mit obesiti iya nya kemi manis, darah tinggi enggau penanggul buah punggung,” ku iya lebuh ditanya Suara Sarawak di Blessing Care Center.

Tandu Nurul, obesiti ba anak mit tu ngasuh sida tusah deka mindah laban pemesai tubuh sereta berat.

“Dikena nyeliah penusah tu, apai indai megai tanggungpengawa besai ngajar anak sida ngambi pemakai ti bepengerai.

“Meseti chakah ba aktiviti lumba enggau anak-anak sereta ngurangka pengawa sida bekenaka telefon bemain ti ngasuh sida ngelusu mindah,” ku iya.

Chi Poh Yung, 47 mega ari Kuching Presiden Gerempung Cerebral Palsy Bagi Menua Kuching enggau Samarahan (Wishesland) madah, penanggul obesiti bepun ari apai indai ti kurang bepenau nguruska pemakai anak sida.

Chi Poh Yung

“Sebedau meri anak pemakai tentuka bacha dulu tusun nutrisyen pemakai kena nentuka pemakai nya manahka pengerai.

“Anak ulih diberi pemakai manis baka chokelet tauka aiskrim tang meseti dijaga pemayuh ambika chunto semina dua kali dalam seminggu,” ku iya.

Tambah Chi Poh Yung, kena nyeliah pekara tu apai indai meseti nyaga pemakai ti bepengerai diambi anak sida sereta minta perintah enda ngetu ngaga kimpin sentang obesiti ti tau ngeruga pengerai nembiak mit.

Nurnadira Nasrull, 33 ari Kuching madah penanggul obesiti nembiak mit tu nyadi ketegal genetik ruang bilik lebuh makai.

“Mayuh obesiti nyadi ari gaya idup ruang bilik ti enda ngambi pemakai bepengerai ti ngasuh penanggul berat tubuh ti lalu nyadi.

“Penanggul baka kemi manis, sakit tungkul ati, kolestrol tinggi enggau darah tinggi deka nyadi ba umur nembiak ti agi muda,” ku iya.

Nurnadira Nasrull

Nurnadira madah meseti ngambi pemakai baka sayur, buah, ikan, dagin enggau ngurangka meri pemakai ti udah diproses ngagai nembiak mit laban pemakai ti baka nya mayuh bahan pengawet ti ulih ngachau pengerai.

Francis Thien, 65 beasal ari Kampung Kenyalang pinchin pekereja perintah madah apai indai tebal agi meri anak sida makai pemakai segera ti tau ngasuh obesiti nyadi.

“Kelalu manjaka anak enggau pemakai segera laban kiruh gawa ngasuh penusah tu nyadi.

“Pia mega, ulah mensia diatu meda anak gendut nya bajik enggau chumil enda tau dipeda jenaka ari apai indai laban tau nanggul pengerai anak sida empu,” ku iya.

Hie Cho Khng, 61 beasal ari Kampung Kenyalang madah meri pemakai ti manis, beminyak enggau ai soda pun nyadi obesiti ngagai nembiak mit.

“Apai indai patut matau penyampau enggau bansa pemakai ti diambi anak sida.

“Enti enda dijaga ulih ngasuh sida gemu enggau penanggul pengerai baka sakit tungkul ati, buah punggung sereta kemi manis nyadi,” ku iya.

Tambah Cho Khng, pengawa nyemerai ulih muai pemerat tubuh lalu ulih meri pengerindu ngagai nembiak mit ngaga aktiviti seraya ngambi pemakai ti bepengerai.

Francis Thien

 

Hie Cho Khng

Suara Sarawak