KUCHING: Pengawa ngatur sekeda aktiviti di Kaunsil Mengeri Kuching Utara (DBKU) ujung minggu tu deka ditetapka bepelasarka Tikas Pengamah Angin (IPU) berindik ari sebun ti majak nyadi diatu.
Sapit Direktor Opis Servis Komuniti DBKU, Rudzaimeir Malek madah, tiga aktiviti ditaga diatur ujung minggu tu, bela kena 15 enggau 16 Ogos tu.
Ku iya, Musical@Museum Ground deka diatur kena Hari Enam, 15 Ogos seraya Kuching Car Free Morning sereta Kebaya Walk ti diatur Kelab Alamanda DBKU deka diatur kena Hari Minggu, 16 Ogos tu.
“Nya kebuah, berati ke utai ti nyadi, DBKU mega udah berandau ba renggat bekaul lalu kitai udah ngaga pemutus matau penusah sebun bepelasarka bacha IPU.
“Kitai meda kemari enggau sehari tu, bacha IPU nambah.
Nya kebuah, kitai deka meda pekara ti nyadi kena Hari Tiga, sekali ke nambah tauka nurun.
“Enti nambah, kitai engka nginsil tauka nangguh aktiviti nya,” ku iya.
Rudzaimeir madah munyi nya ba aum pemberita serimbai Retro Zumba enggau Aerodance ti deka diatur kena 13 September tu di Hotel Waterfront Kuching, ditu kemari.
Iya madah baru, DBKU mega deka nitih ke gerah raban bekuasa sereta majak matau bacha IPU belama.
Ku iya, baka sanding penemu Datuk Bandar Kuching Utara, Datuk Hilmy Othman, peranak ditu dipinta nyaga pengelikun enggau pengerai diri sepanjai timpuh sebun.
“Kitai udah napi penusah sebun tu berapa taun tu udah lalu kala napi penusah ti balat agi ari tu.
“Nya kebuah, aku pechaya peranak udah nemu pasal atur ti patut dikereja nyengkaum ngurangka aktiviti fizikal, ngena sengkabung mua enggau bejalaika aktiviti ti patut dikena nyaga diri,” ku iya.
Ke rikod, bepelasarka bacha ti dipandang ba website rasmi Opis Rampa Menua (JAS), mengeri Kuching ngerikod bacha IPU 163 naka pukul 12 tengah hari kemari. – NUR HAZIRAH SHUKUR
