Ali ngetuaika 19 ejensi baumka pemansang Saratok

SARATOK: Sapit Menteri Pengeluar Kuasa enggau Pengeraja Asal, Ali Biju, udah ngatur randau begulai enggau bala ketuai ejensi Perintah Besai bejuraika semua pekara ngaul pemansang Pelilih Saratok.

Ku iya, sida besilih penemu pasal pengawa ngemansangka menua Saratok sekalika ari sukut ekonomi, pelajar, pengawa rama enggau pengelantang rayat menua nya.

“Pekara dibai dalam randau tauka aum kami sekali tu meri fokus ngagai projek pemansang penuh menua tu.

“Randau baka tu enda tau enda diatur nentuka perambu enggau langkar pemansang ulih dipejalai enggau meruan sereta lanchar.

“Kitai deka ngempung penemu semua ejensi bekaul ngambi langgur pemansang ulih mungkur semua pekara,” ku Ali lebuh ngetuaika randaukena pagi Hari Satu, 6 Julai, ba Wisma Persekutuan ditu.

Iya nyemetak madah, lima batang pekara pemansang ngaul ekonomi, pelajar, pengawa rama enggau pengelantang nyadika pun penumbuh pemansang bukai.

Sepenyampau 19 ejensi udah ngulu randau tu iya nya ari IADA Kalaka-Saribas, Opis Pelajar Pelilih Saratok, Opis Pengerai Pelilih Saratok, Opis Pengintu Pengelantang Mensia Mayuh (JKM) Saratok, MPOB Saratok, Opis Bekal Ai Menua Pesisir (JBALB) Sarawak enggau JKR Saratok.

Tu nyengkaum Opis Pelilih Saratok, Opis Pelilih Kabong, Kaunsil Pelilih Saratok, Opis Bomba enggau Penyah Penusah Saratok, Opis Rela Saratok, Opis Pemadah Saratok, Opis Pengerejister Bansa (JPN) Saratok, Opis Pemansang Mensia Mayuh (Kemas), Kaunsil Pemansang Ikan Malaysia (LKIM), Opis Pengereja Pengawa, Gerempung Kerejasama Malaysia Saratok enggau Polis DiRaja Malaysia (PDRM) Saratok.

Suara Sarawak