PENANYI veteran tebilang, Alon Lupeng datai baru enggau lagu baru iya ti pejuluk Bujang Semalam dalam jaku Bidayuh.
Empai lama, iya baru udah ngeluarka dua buah lagu baru diri ba baruh perabung Twin Tone Production (TTP).
Dua lagu baru ari iya baka lagu Puang enggau Bujang Semalam dalam jaku Iban.
MAYUH PENGELANDIK
Kelimpah agi chakah belagu enggau merindang, iya mega suah dikangau nyadi emsi ba mayuh bengkah program tauka pengerami.
Alon Lupeng mega suah dikangau nyadi akim ba bemacham pekit belagu ti bisi diatur kelebih agi ba bagi menua Kuching ditu.
Ukai naka nya aja, iya mega siku komposer enggau penengkebang lagu bepenau.
Peranak Bidayuh asal ari Kampung Mantung Birawan, Serian nya madah, iya kala nerima Anugerah Khas ari Cats.fm iya nya Penanyi Ukai Iban Anugerah Juara Rentak Ruai 2010 (AJJAR 2010).
MINAT BELAGU
Ngelansa senentang minat iya ba pengawa belagu, Alon Lupeng madahka diri ngepun pejalai ba pengawa nya lebuh umur iya manggai 18 taun nyentuk diatu.
“Ketegal minat belagu, dia deh aku chakah ngaul raban band ba menua ditu lalu kami sebuat suah merindang ba selampur pelilih Serian, Padawan enggau Bau.
“Laban ngembuan pengerindu ti besai ba pengawa belagu, dia aku pen nguji enggau orang ngeruh ai masuk mayuh bepekit belagu.
“Nya nyengkaum bemacham pekit belagu ti diatur ba pelilih Balai Ringin, Serian enggau Kuching.
“Ba pekit nya, aku suah bulih penuduk champion, kedua enggau ketiga,” ku iya lebuh dirandau Suara Sarawak.
PEJALAI MERINDANG
Ku Alon Lupeng, iya berengkah ngerikod lagu Bidayuh ba taun 1993 ba baruh perabung Serikat Golden Pearl (GP) begulai enggau penanyi tebangkar nama, Jenny Tan.
“Urung taun 90-an, aku diambi tauka dikangau nyadi artis ba program Radio Televisyen Malaysia (RTM) Kuching baka Program Bingkisan Sarawak enggau Program Irama dan Lagu.
“Aku mega kala ngaga tiga buah album lagu Bidayuh dalam keset ba baruh perabung GP.
“Entara lagu aku ti tebilang sereta dikerindu mensia mayuh rambau nya suba baka Joget Asih Boh Ganan, Joget Bunga Payung enggau ti bukai,” ku iya.
Ba taun 1999, Alon Lupeng madahka diri berengkah ngerikod lagu enggau Serikat SpitFire lalu mujur ngeluarka empat buah album lagu Bidayuh dalam VCD.
“Papa Sayang Mama, Joget Cap Piranuk, Kecewa Rangkai, Joget Aba Nipu, Maseh Laku Bujang Tuuh entara lagu iya ti tebilang maya nya suba.
“Udah nya, taun 2000, aku nyereta serikat Andrewson Ngalai Production (ANP) sereta ngeluarka urung 20 lagu Bidayuh,” ku iya.
Nangkan nya, ku tusui iya, ba taun 2008, iya pulai baru ngagai Serikat SpitFire.
NGINDANG SAYAP DIRI
Taja pen bebansa Bidayuh sereta tebilang ba industri muzik Bidayuh tang nya enda nagang Alon Lupeng ngindangka sayap diri tama industri muzik Iban.
Iya madah, ba taun 2010, 2011, 2014, 2016 enggau 2017, iya bisi sereta berengkah ngeluarka lagu Iban.
“Sekeda ari lagu Iban aku chukup tebilang ba Sarawak sereta dikerindu mensia mayuh.
“Nya nyengkaum lagu Pinang Belah Tiga, Pala Sebingau, Berangat Asai Chabi, Diau Sebulan, Pinang Belah Dua enggau Goyang Mia,” ku iya.
Pia mega, ba taun 2019, iya tama Serikat Gilson Production lalu ngeluarka album kediri empu kelimpah lagu Sanggup Bedarat Nujah Ujan enggau Gilek-Gilek Kepala.
Lalu pemadu baru, ba baruh perabung TTP, iya ngeluarka dua buah lagu baru diri ti pejuluk Puang enggau Bujang Semalam.
