KUCHING: Peminta status peranak menua di baruh Perkara 15A Konstitusyen Perintah Besai semina ditatak ungkup anak mit ti nadai status peranak menua aja.
Menteri Pengintu Pendiau, Pengelantang Komuniti, Orang Indu enggau Pemansang Anak Mit (KWKPK) Datuk Seri Fatimah Abdullah madahka, status peranak menua di baruh Perkara 15A nya semina diungkupka ngagai anak mit ti nadai status peranak menua tauka status apin ditentuka agi.
“Enti sema anak mit nya bisi pasport tauka status peranak menua bukai baka Indonesia, Filipina tauka menua bukai, tu nandaka sida udah nyadi peranak menua bukai lalu peminta nya enda ulih digaga nengah Perkara 15A.
“Peminta ti bakanya enda diterima laban Konstitusyen Perintah Besai enda ngemendarka orang ti ada ba menua ngembuan dua status peranak menua taja bisi menua ti ngemendarka pekara nya,” terang iya.
Fatimah madah munyi nya ba aum pemberita Ripot Ninting Bulan Mutarka Penanggul Dadah enggau Substance (MIDS) ungkup bulan March di Begunan Baitul Makmur II ditu tadi.
