BA dunya digital kemaya hari tu, pengawa orang ti nipu ukai pekara ti jarang nyadi. Sida nipu enggau bemacham chara baka nengah pesan, kangau, email nyengkaum iklan ti ngasuh orang pechaya.
Kes nipu majak nambah ukai ketegal pemansang teknologi aja tang ketegal orang majak kiruh enggau pengelantang tali arus tauka online.
Bala penipu nemu siti pekara iya nya kitai rindu ke kaul ti jampat sereta muntang, nya mih pintu penama besai sida.
Ba mayuh kes, orang ti kena tipu nadai awak berunding panjai laban penemu ti dipansuka bala penipu nya endang ngasuh sida pechaya ke pekara nya amat nyadi lalu ngasuh sida pabu runding.
Gaya nya ukai agi isu orang ti kurang pelajar tauka orang tuai baka ti suah disebut tang nya ngaul bala profesional, rebak biak enggau sida ti landik ba IT mega pen ulih kena tipu sida.
Kebuah pia laban bala penipu diatu beoperasyen baka gerempung profesional ngena skrip, teknologi, latih enggau pengawa matau ti silik. Sida mansik ulah, jaku, budaya enggau chara kitai ba pekara wang ngambi pengawa nipu sida tampak bendar.
Sekeda orang ti nipu nyaru diri nyadi pegawai bank, pegawai opis perintah, kaban sama gawa tauka orang ti tebilang nama laban sida nemu kitai endang arap ke raban orang ti bekuasa.
Nya alai, lebuh ati kelalu kesal, kitai muntang agi ngasi ke atur ti dikumbai kitai datai ari raban bekuasa. Udah nya, dalam enda ngeleda, kitai meri password, lumur TAC, lumur akaun bank tauka penerang diri ngujungka semua nya nyadi tikit sida tama ngagai kerepai digital kitai.
Diatu orang ti nipu ukai semina minta duit aja.
Bisi sekeda ngiga data, gambar, identiti enggau semua bansa penerang ti sensitif.
Data tu dijual, didagang lalu dikena nipu orang bukai, baka apai indai, menyadi, kaban belayan sereta bakih ti semak enggau kitai.
Nya mih perang kemaya hari tu lalu nya ukai semina pasal duit aja tang pasal pengelikun digital enggau identiti kitai empu.
Pengeleda patut berengkah ari pekara ti pemadu pemun iya nya anang muntang pechaya ngagai sebarang orang pia aja kelebih agi orang ti enda dikelala.
Enti kitai bisi nerima kangau ti ngasuh kitai jampat ngereja pengawa ti diasuh sida, nya mih siti kelai jaku tangkan ti pemadu besai.
Kitai meseti berunding, ‘nadai pemesai bank minta lumur TAC’, ‘nadai polis ngasuh kitai mindahka duit nengah telefon’, ‘nadai ejensi perintah nganjung pesan WhatsApp minta penerang ti dilalai’.
Semua tu semina skrip lama ti agi digaga sida laban kitai seruran deka mutarka penanggul enggau jampat tauka muntang laban kitai kitai enggai rugi.
Orang ti nipu mega landik ngemba kitai enggau penakut, sida madah ke akaun bank kitai ditutup, nama kitai dipasuk ba rintai nama orang bankrap tauka kitai didawa bisi ngereja penyalah. Asal kitai kesal ati, sida menang.
Nya kebuah atur pengelikun ti pemadu beguna iya nya ngetu enda lama. Ambi awak alai berunding.
Betanya sereta meresa naka ni pemendar kangau nya. Anang sekali kitai nekan link ti enda dikenuku, taja pen nya dipeda datai ari institusyen perintah ti rasmi.
Mayuh laman web bula diatu digaga sebaka nyentukka kitai tusah deka ngelala ngena mata kasar.
Kitai patut meresa penerang ngena laman web rasmi tauka aplikasyen ti amat, ukai link ti dikirum nengah pesan ti enda beradat
. Anang enda nyaga penerang diri baka nyaga lumur pin ATM kitai laban nya amat berega kelebih agi ba dunya digital kemaya hari tu.
Password mega patut tegap sereta bebida ungkup genap iti akaun kitai, ukai siti password ungkup semua utai.
Anang enda ngatur pengawa ngenuku dua faktor (2FA) taja pen pengawa nya bisi lungat mimit.
Manah agi kitai kiruh ngatur pekara nya ari kitai napi pengerugi besai ba sekelip mata aja.
Kitai mega meseti ngelalau diri sebilik kelebih agi orang tuai enggau nembiak rebak baru ti muntang agi tepedaka utai nya tauka muntang agi kena tipu.
Mayuh kes nyadi ketegal orang ti ditipu enda nemu dini endur minta jaku lalau.
Kitai patut ngaga normalisasyen randau pasal pengawa nipu ukai ngena chara ngemba sida aja tang ngena chara mereti ke sida
. Anang ngemaluka orang ti udah kena tipu laban pemalu semina ngasuh mayuh orang takut ngeripot.
Mayuh agi orang bejaku sereta meri pengeleda, tusah agi bala penipu deka nguji nipu kitai.
Dunya engka penuh enggau risiko tang penemu sereta peneleba seruran nyadi terabai ti pemadu tegap. Kitai enda ulih nagang orang ngetu nyadi scammer tang kitai ulih nagang peluang sida nipu orang ti dikesayau ke kitai.
