Anang guai ngusung rumah panjai kami

SIBU: Komiti Pemansang enggau Pengelikun Genturung Pendiau (JKKK) Rumah Akul Dagang, Salim Belalang ditu nagang peranak bukai nguang ngagai rumah panjai sida kandang diatu.
Tuai Rumah Akul Dagang ke nyadi Chairman JKKK nya madah, jaku tangkan nya dituju ngagai semua orang luar ke nadai kebuah berat niki ngagai rumah panjai sida.
Ku iya, atur nya ukai enda bebasaka bala temuai tauka penguang ke datai tang sida serumah ngasika Atur Mindah Betagang (PKP) diteritka perintah kandang 14 hari nya.
“Kami serumah chukup bebasaka atur dipejalaika perintah ngambi penyakit Covid-19 tu jampat pukas lalu kitai ulih diau lantang baka suba.
“Ari nya kami minta orang luar meri kerejasama sekumbang PKP tu dipejalai ke pemaik kitai begulai. Pukas pandemik tu ila, nadai salah kita nguang kami ditu,” ku iya lebuh dirandau Suara Sarawak, kemari.
Nambahka nya ku Tuai Rumah Akul, sida serumah berasai irau sereta nangi laban Kluster Pasai diatu benung balat ngerekai ke ngujungka menua Sibu dalam zone mirah.
Nitihka berita, kluster nya diatu ditemu nyau di menua Kapit ke ngelama tu ngetanka rikod Zon Gadung sekumbang Covid-19 ngerekai kenyau ari taun 2020 nyin tadi.
“Kitai di menua tu nyau asai beperang dalam petang lebuh ngelaban munsuh ke enda ulih dipeda ngena mata kasar.
“Asai sepi aku empu, nyau pedis agi ari ngelaban komunis kelia laban ulih munuh seput enggau enda ditemu (senyap).
“Ari nya kami minta kasih nadai ngira kita nya kaban belayan jauh tauka semak enggau bala bukai, besaup mih kitai nagang enggau ngerintaska rantai penyakit dunya tu.
“Sinuka bala ke gawa di luan kelebih agi sida di sepital din ke berambunka nya dikena ngidupka seput orang bukai,” ku iya nyimpul randau.
Dulu ari nya, PKP diteritka di Sibu pengelama 14 hari berengkah ari 16 Januari nyentuk 29 Januari tu berindik ari kes dirampit ari Kluster Pasai majak nambah.