KUCHING: Pengawa nyendia perengkaguna pemun ti genap agi di kandang menua pesisir sereta Skim Nangkir Kampung Sau enggau Kampung Kuala Balingian meseti diberi perati dikena nambahka pengelantang enggau ngangkatka tikas pengidup peranak dia.
Kaban Kunsil Nengeri (ADUN) Balingian, Dr. Abdul Yakub Arbi madah, pengawa nyendiaka bekal ai beresi, bekal kuasa karan enggau perengkaguna telekomunikasyen meseti majak ditegapka, kelebih agi ba kandang endur ke agi betapi enggau penanggul suntuk infrastruktur nya.
Ku iya, kededua skim nangkir genturung pendiau nya mega patut dikemanah nengah pengawa nyendiaka infrastruktur pemun ti negap agi, nyengkaum taba lot besapat, jalai alun enggau sistem parit.
Iya madah, perengkaguna nya beguna endar dikena nentuka kandang genturung pendiau nya ulih mansang nitihka perambu, kelimpah meri pengelantang ngagai peranak menua nya.
“Aku minta Skim Nangkir Kampung Sau enggau Skim Nangkir Kampung Kuala Balingian dikemanah nengah pengawa nyendiaka perengkaguna pemun ke genap agi,” ku iya lebuh bejuraika Rang Undang-Undang Belanja 2027 ba Aum Kedua Penggal Kelima Kunsil Nengeri Ke-19 Sarawak, kemari.
Iya mega minta penerang ari raban ke bekaul senentang status pemadu baru peminta ngemanahka kededua skim nangkir genturung pendiau nya ngambika peranak ulih nerima penerang ke betul senentang pejalai sida.
Abdul Yakub ngarapka sektor betanam betupi enggau dagang menua tu terus ditegapka nengah pengawa nyendiaka perengkaguna jalai alun, latih, nambahka produktiviti enggau akses makit dikena nyungkak penatai pemisi peranak.
Ku iya, pemansang di kandang menua Balingian ukai semina patut ngemeratka pengawa nyendiaka perengkaguna pemun aja, tang mega ngangkatka tikas pengidup rayat nengah pemansang ekonomi kandang menua ti seruran dipejalaika.
