Anang ‘mang tulang’ ngiri penemu, ku Andrew

KUCHING: Bala nembiak diperansang angkunka pelajar sekula sereta berundingka pengiruh enggau pengepuh apai indai nyekulaka sida.

Kebuah pia ku Fasilitator SADIA-APAN Learning Awareness and Study Smart Programme Andrew Paul, semua kitai nemu pelajar nyadi kunchi penyulut enggau mansutka diri ari perekuh penyeranta kelimpah nyamin pengidup sida dudi hari.

“Kebuah program tu ditumbuh suba mega endang tuju iya dikena ngiri penemu lalu nembiak sekula sedarka pemesai reti pelajar ba pengidup.

“Ari perati ba enam renggat atur program sebedau tu, berengkah ari taun 2016, bisi amat insur bala nembiak ti udah ngulu program kelebih agi ba penyapai sida dalam akademik.

 

KENANG RAMA… Andrew (duduk tengah) begambar nyadika pengingat jemah

“Enda lebu apai indai sida udah bebendar ngansak bala anak belajar enggau ngiri penemu ari luar kelas. Pengawa baka tu dikedeka kitai, apai indai enggau anak sida bela angkunka pelajar enggau ransing ngiri penemu,” ku Andrew madah nyemetak.

Program mujur diatur sehari nyentuk ba Indu Opis SADIA Kuching ditu nerima timbal chukup manah ari bala penyereta enggau apai indai sida.

Ku Andrew nampung, ari pansik udah dipejalai sekeda raban, ukai semina orang ke pandai enggau pintar runding aja ulih nampung pelajar ngagai palan pelajar tinggi laban udah ditemu kebuah sida tu mujur.

“Chara belajar ti betul tauka Effective Learning. Enti kitai nemu sereta ngena chara belajar ti nemban, kitai mega teulihka pemujur sebaka enggau sida ke pandai, laban bida iya bepanggai bac hara kitai belajar.

 

NYINUK… Bala penyereta nyinuk mending licha dikenataika Andrew

“Kelimpah ari nya, bala nembiak enda tau enda ngembuan ulah angkun enggau rindu belajar tauka disebut passion enggau pengeras ati deka mujur tauka self determination sereta orang ti ngembuan ulah puh belajar mega ulih bulih degree.

“Ba program tu, kitai mayuh nunjuk enggau nerang baka ni pekara tu ulih nyadi. Tu mega nyaup bala nembiak nyengkaum apai indai sida netapka kuing singkang ba pelajar jemah,” ku Andrew nambah.

Taja program baka tu ukai keterubah diatur tang kitai nyelinting raban ti diasaika patut dibantu kelebih agi bala nembiak ti benung belajar, sekalika ba tikas sekula primari tauka sekondari, meri peransang ngagai sida seraya bekunsika penemu ti tuai agi enggau ngasi.

“Apai indai ti ulih limpang anang enggai nganjung bala anak sida ngulu program tauka randau baka tu, anang bisi ati sanggu betanya laban program tu disedia nadai bebayar ungkup pemaik semua,” tandu Andrew.

Sepenyampau 28 iku nembiak ngulu program tu lalu sekeda disempulang apai indai lalu kesemua penyereta ari program keterubah deka digempung ba sebengkah ruai ba facebook ti dikumbai Iban Educational Platform (IEP).

Pelasar IEP tu nyadi ruai bekunsika penemu, endur betanya seraya nibar sebarang randau ngaul pelajar enggau pemansang rama bukai, ku Andrew nyimpul.

Atur program ke sama mega bisi diatur baru kena 24 Mac tu lalu barang sapa ke bisi ati ngulu program tu diperansang rejista diri tumu ngambi bala komiti pengatur nyamai ngelanggur enggau nyendiaka kereban belajar ungkup program nya ila.

Penerang silik tau mega betanya nuju Andrew Paul ba lumur 013-800 1580.

SAUT-TANYA… Andrew betanya sekalika bala penyereta meretika penerang tauka bisi tanya ngaul jurai dikenataika iya.
MUNGKAL PEMAIK… Andrew Paul

 

Suara Sarawak