Anang salah guna media rama maya bisi penanggul

KUCHING: Menteri Dagang Temuai, Seni, Main Asal, Nembiak enggau Lumba Sarawak Datuk Abdul Karim Rahman Hamzah nyemetak madah komuniti patut lebih mereti sereta nguna media rama enggau enda ngapika penanggul sereta ngajum sebarang orang ngereja pengawa ke enda menuku.

Iya madah munyi nya, lebuh meri timbal bekaul enggau pemarai siku indu beumur 16 taun ti ngamatka undi undian mensia mayuh ti ngundi iya ‘mati’ nengah chara terejun munuh diri ba Batu Kawa apin lama ke udah.

Maya dirandau pemberita rambau program Ten Outstanding Young Malaysians (TOYM) 2019, Abdul Karim madah chukup sinu ninga berita nya laban ba penemu iya indu biak beumur 16 taun nya endang orang ke ulih nyaup ngemansangka menua.

“Kitai bela nemu indu nya chukup kusut runding enggau penanggul diri sebilik ke ditapi, beduduk ari nya penanggul nya iya kempang munuh diri.

“Kelimpah nya mega datai ari pekara ke ditanya iya ari media rama lebuh ngaga undi,” ku iya.

Abdul Karim ngarap barang ke bisi penanggul, sida patut ngiga orang ke ulih mendingka penanggul, sereta ngiga sebarang organisasyen ke bekaul nyaup mutar penanggul nya.

“Kebendar nama aja penanggul tentu bisi jalai mutar, enda ngira nya penanggul diri sebilik, lalu dikearap ulih mutar penanggul,” ku iya.

Iya mega minta mensia mayuh anang salah guna media rama ungkup pekara ke meri pangka enda manah baka ngajum tauka ngaga tanya ti meri timbal.

“Dalam media rama, kitai enda nemu ngelala penatai irang ke nguna media rama, tambah mega tentu bisi ke nadai ngembuan ati sinu sereta kasih.

“Nya alai, anang kelalu bepanggai ngagai media rama ngaga tanya ke tau nganu nyawa,” ku iya.
Berebak enggau nya iya madah nengah opis menteri iya mayuh pengawa pengawa udah digaga piak sida ungkup raban nembiak di nengeri awakka chakah ba program komuniti.

“Nengah nya kitai ngatur mayuh program ke pemaik raban nembiak sereta nengah pengawa lumba enggau main asal.

“Ngarapka bala nembiak bulih pemaik enggau nyadi nembiak ke mujur lebih agi dalam begulai enggau komuniti.

“Enti begulai enggau orang tuai ambika banding sida patut lebih bebasaka enggau patut meretika pendiau pangan diri,” ku iya.