KUCHING: Perintah Sarawak deka terus ngenegapka chara strategik ngatur fasiliti menua nengah chara nanggam kerejasama perintah enggau peribit dikena nentuka aset perintah diatur enggau efisyen, meruan sereta berega ba timpuh panjai ngagai rayat.
Sekretari Perintah Nengeri Sarawak, Datuk Amar Mohamad Abu Bakar Marzuki madah, chara nya nipak rambai jaku
aum besai 5th Facility Management Asia Conference (FMAC2026), iya nya Pengatur Perengkaguna Meruan: Penguntung Ngagai Semua Raban Bekaul ti ngayanka transformasyen Sarawak kemaya hari tu.
“Strategi Pemansang Pengudah COVID-19 (PCDS) 2030 netapka aspirasyen deka ti ngubah Sarawak nyadi siti menua maju ti dipejalai ngena data enggau inovasyen sereta ekonomi ti tumbuh meruan, pemansang inklusif enggau kualiti pengidup ti manah agi.
“Ba pengawa ngatur perengkaguna, perati ukai semina patut ngaga infrastruktur baru aja, tang mega nyengkaum baka ni aset mensia mayuh diatur, dipejalaika sereta diintu sepemanjai timpuh perengka nya dikena,” ku iya.
Mohamad Abu Bakar bejaku munyi nya rambau bejadi FMAC2026 ba siti hotel ditu, kemari.
Ku iya, infrastruktur mensia mayuh nyadi puku besai ti ngena duit mensia mayuh, nya alai perintah megai tanggungpengawa ti besai dalam nentuka aset nya terus manah, nyendia servis ti bekualiti sereta meri penguntung timpuh panjai ngagai rayat Sarawak.
Iya madah, nengah penumbuh ekonomi sereta rentayan infrastruktur ti majak besai sereta kompleks, chara lama berati ke perintah terus merambu, ngaga, bejalaika pengawa enggau ngintu genap aset engka ukai agi model ti pemadu engkeman enggau nemban.
“Berindik ari nya, perintah begunaka perati ba sukut pengawa merintah, atur, polisi enggau matau prestasyen, seraya sektor peribit bejalaika tanggungpengawa ba pengawa meri servis nengah pengelandik, teknologi enggau penau operasyen.
“Chara kerejasama perintah enggau peribit udah dikemeran ba mayuh bengkah menua lalu udah ngasuh perintah ransing sereta efisyen agi lalunentuka servis mensia mayuh terus dipejalai dikena nangkup peminta rayat.
“Sarawak udah bejalaika chara tu ba servis ngumpul uras ke alai perintah netapka standard, matau prestasyen sereta nentuka akauntabiliti, seraya operator peribit meri pengelandik, teknologi enggau efisyen operasyen sida,” ku iya.
Iya madah, pemujur tu patut dikemansang berenggat ngagai bidang bukai dikena ngatur aset mensia mayuh, nyengkaum operasyen enggau ngatur palan meresi ai menua pesisir ti diatu dipejalai Opis Bekal Ai Menua Pesisir (JBALB).
Ku iya, nengah model kerejasama perintah enggau peribit, sektor peribit ulih meri pengelandik teknikal, peneleba operasyen enggau chara mutarka ti inovatif dikena ngemanah perengkaguna lalu nentuka raban bekaul ulih ngesan tanggungpengawa nyadi pengatur strategik, pengatur pengawa kunterik enggau pengatur prestasyen.
Tandu iya, chara nya mega ulih dikerembai ngagai pengawa ngatur pengelikun begunan perintah, rampa menua enggau servis sukung fasiliti bukai dikena nambah kualiti servis enggau manah agi lebuh ngena perengkaguna menua.
Iya nyemetak madah ke transformasyen nya deka ngubah pangku pengawa perintah ari bejalaika terus semua pekara operasyen ngagai pengempu aset ti strategik agi nengah ngemeratka standard ti nyengala, pengawa ngulihka servis ti nemban, ngatur kunterik profesional, matau prestasyen enggau nentuka pemaik pemadu manah ngagai genap belanja mensia mayuh ti dikena.
