KUCHING: Sarawak enggau Sabah patut nerima abis nadai 70 peratus ari asil chukai karbon nyema mekanisme nya dipejalai ba renggat Perintah Besai, seraris enggau pangku pengawa kededua kandang menua nyadi penyimpan besai karbon menua.
Premier Sarawak, Datuk Patinggi Tan Sri Abang Johari Tun Openg madah, pemesai kampung ujan tropika sereta paya bakau di Sabah enggau Sarawak nya aset strategik menua nginsap karbon enggau nyukung agenda global mutar ubah klimet.
“Sabah enggau Sarawak nya penyimpan karbon menua.
“Enti Perintah Besai netapka chukai karbon, abis nadai 70 peratus ari asil pupu nya meseti dipulai ngagai Sabah enggau Sarawak laban kitai nyaga kampung ti nyadi nginsap karbon,” ku iya.
Abang Johari madah munyi nya ba Pengerami Makai Lemai Gala Gawai-Kaamatan Begulai Ke-17 diatur Balai Dagang enggau Industri Dayak (DCCI) enggau Balai Dagang enggau Industri Kadazan Dusun (KCCI) di Kompleks UNIFOR, malam kemari.
Ku iya, pengawa ngagihka asil nya beguna endar nentuka nengeri ti nyaga pemansut karbon menua nerima pemaik ti patut
dikena negap pengawa ngintu rampa menua, ngemansang teknologi gadung sereta bejalaika agenda pemansang meruan.
Abang Johari mega madah, Sarawak udah bejalaika pengawa tumu agi nengah ngaga undang- undang bekaul karbon dikena besikap ngemansang ekonomi karbon chara berurun lalu ngangkatka nengeri tu ba luan ba pemansang ekonomi gadung.
Ku iya, chara nya ukai semina ngentapka penuduk Sarawak ba makit karbon global tang mega nentuka nengeri tu ngatur pemansut karbon berurun agi nipak prinsip pemeruan.
Iya mega nyemetak madah ke Sarawak enggau Sabah meseti terus negap kerejasama dikena negi hak begulai bekaul polisi karbon menua ngambi sebarang pemaik ekonomi ti diasil ari pemansut asal ba kededua kandang menua ulih dipulai chara asi.
Terang iya, inisiatif nya seraris enggau inisiatif perintah nengeri nentuka pemansang ekonomi gadung dipejalai chara inklusif lalu enda ngeruga pengawa nyaga pesaka rampa menua ti nyadi pengelebih besai Borneo.
Bela datai, Menteri Kereja Raya, Datuk Seri Alexander Nanta Linggi, Menteri Penyerakup Bansa, Datuk Seri Aaron Ago Dagang, Sapit Kepala Menteri II Sabah, Datuk Seri Panglima Dr Joachim Gunsalam, Menteri Industri Pemakai, Komoditi enggau Pemansang Kandang Menua Sarawak, Datuk Seri Dr Stephen Rundi Utom, Menteri ba Opis Premier Sarawak, Datuk Seri John Sikie Tayai, Sapit Menteri Pengangkut Sarawak (Langit enggau Darat), Datuk Jerip Susil, Sapit Menteri Dagang Antarabansa, Industri enggau Pengawa Meranak Puku Sarawak, Datuk Dr Malcolm Mussen Lamoh, ex-Sapit Kepala Menteri Sarawak, Datuk Patinggi Tan Sri Dr Alfred Jabu Numpang, Chairman Yayasan Tun Jugah, Datuk Patinggi Tan Sri Leonard Linggi Jugah, Presiden Balai Dagang enggau Industri Dayak (DCCI), Datuk Allan Keripin Nangkai, Presiden Balai Dagang enggau Industri Kadazan Dusun (KCCI), Datuk Ladislaus Maluda sereta Chairman Pengatur DCCI, Kilat Beriak. — EDISI UKAS
