Bala indu dara diperansang nyereta Pekit Ratu Agrofest

KAPIT: Pekit Ratu Agrofest bisi diatur beserimbai enggau Program Kapit Agrofest 2019 ke ditaga diatur dalam bulan baru (September).

Tu entara aktiviti ti disadang ulih matak penatai temuai sereta ngerichahka agi program tu ila.

Pengawa ngiga raban indu enggau nyereta pekit Ratu Agrofest bisi diatur dalam kandang beberapa hari ke udah.

Nya alai, bala indu dara ke agi rumpas ditu, beumur urung 18 taun nyentuk ke 35 taun ke bisi ati enggau nyereta pekit tu tau nganjung nama diri empu ngagai komiti pengatur pengawa tu.

Program tu diatur Opis Betanam Betupi Kapit begulai enggau opis perintah ke bukai bepalan ba Kompleks Perintah Nengeri , Beleteh ditu.

Tuju Kapit Agrofest tu diatur awakka mensia mayuh kelebih agi peranak menua Kapit enggau Song ulih ngaga promosyen produk asil ari betanam betupi sida iya.

Beserimbai enggau pengerami nya, program baka mandangka asil betanam betupi enggau pengawa berikan bisi dibantai ba ruai palan bejual barang ke udah disedia.

Kelimpah ari nya, pengawa mantaika asil kraf jari baka pua kumbu, leka manik, leka buri enggau ke bukai bisi dipandang maya tu.

Program sepengelama tiga hari tu bisi mega ngajar mensia mayuh betanam ke buah rian musang king, pengawa ngaga sum organik, bakani chara ke patut nupi kelulut, demotrasyen manduk lauk, ngajar mensia mayuh ngelaku ke asil kraf jari nengah media rama sereta ke bukai.

BAUM…Pemesai Opis Betanam Betupi Kapit (kanan) Badin Unor begulai enggau Adun Bukit Goram, Jefferson Jamit, Sapit Residen Kapit, Galong Luang sereta komiti pengatur program ke bukai.