BAU: Perambu ngaga Balai Mayuhguna Sekula Primari (SK) Opar diperati ulih nambah fasiliti pelajar ba kandang menua pesisir lalu nyendiaka rampa belajar ti lantang agi ngagai bala nembiak.
Kaban Kunsil Nengeri (ADUN) Opar, Billy Sujang madah, fasiliti baka balai sekula beguna endar dikena nyukung pejalai bemacham aktiviti pelajar, kokurikulum sereta program ngaul komuniti menua.
Ku iya, nembiak ba kandang menua pesisir mega patut ngasai fasiliti pelajar ti menyana agi setipak enggau pengawa perintah nambah pemansang modal mensia.
“Balai sekula digaga ukai semina meri awak ngagai bala nembiak ngatur aktiviti begelumu enggau kokurikulum, tang meri peluang ngagai raban sekula ngatur bemacham program ti ngaul komuniti menua,” ku iya.
Billy nibar ke jaku nya lebuh ngetuai pejalai ngabas taba ngambi meda perambu taba numbuhka Balai Mayuhguna SK Opar di Kampung Opar, ditu ensanus.
Sebedau nya, siti pengawa nyerah projek tembu Balai Mayuhguna Kampung Opar mega diatur kelai pemujur projek pemansang digaga ba sitak nya.
Balai beungkus RM450,000 nya digaga ngena agih belanja Ejensi Penyeraris Pemansang Greater Kuching (GKCDA) lalu tembu menyana pengudah kereja projek belabuh 7 Julai 2025 tembu kena 6 Januari 2026.
Projek tembu nya diserah ngagai Tuai Komuniti Kampung Opar, Dewen Giam ngambi bisi dikena peranak dia ngatur bemacham aktiviti.
Sama datai, Tuai Pegawai Eksekutif GKCDA, Datuk Ik Pahon Joyik, Injinir Pelilih Opis Kereja Raya (JKR) Bau, Allyson Hilbert, pengari kunteriktor, bala pengajar SK Opar sereta bala tuai komuniti dia. – EDISI UKAS
