Bansa Dayak ditesau sampal ngabang Gawai Naik Dango di Landak

KUCHING: Panitia Naik Dango Ke-34 Kabupaten Landak 2019 nesau bala menyadi bansa Dayak di menua tu sampa datai ngulu pengerami besai ti diatur ba Laman Besai Rumah Radakang Aya’ di Kabupaten Landak.

Pengerami tu deka diatur 27 April berengkah ari pukul 8.30 pagi nyentuk atur pengawa tembu lalu bala pengabang diperansang datai tumu sehari.

Nitih ku penerang ari Mandal Ketuai Raban Pengabang, Victor Ason ari Dayak Bukit Kelingkang, ti bisi dikangau ngabang seraya malas duruk ari bala menyadi sepiak nyin lalu hari bulan enggau atur pejalai ngabang udah ditetap berengkah ari 26 nyentuk 28 April.

“Pagi 26 April kami sebuat deka meleka ari Tebedu napatka menua Entikong lalu paking entukar di Pak Saribu.

“Kami deka ngetu merarau ba Sang Sang di Kota Ngabang sebedau nampung pejalai ngagai Keraton lalu napatka menua dikumbai Rumah Radang Pahauman sebedau mulaika diri ke Kota Ngabang, endur bala diau bemalam,” ku Victor ngelansa atur pejalai hari keterubah.

GAWAI BESAI… sekeda ari atur pengerami dikena ngintu Gawai Naik Dango diatur Kabupaten Landak kena 27 April tu.

Ku iya, muakka malam pengudah tembu ngintu diri, sida deka dibai ngagai Rumah Radang bekelala enggau bala menyadi dia kelimpah diperindang ngena main asal kitai Dayak sebedau mulaika diri ke hotel, belelak.

“Tumu pagi 27 April, pengudah ngirup pagi, kami deka dibai baru ngagai Rumah Radang lalu nitihka atur program sereta meda gaya atur pengerami dikumbai Gawai Naik Dango.

“Tu batang pejalai kami kin ke amat lalu kitai ngarap ulih nanggam kaul sereta nyidi peturun aki ini kitai ari menua nya,” ku Victor lebuh dirandau Suara Sarawak kemari.

Datai ba hari mulaika diri ke menua kena pagi 28 April, ku Victor, sida disadang dibai ngagai gerija sebedau napatka menua dikumbai Balai Karangan.

Kami ngarapka mayuh agi bala Dayak ari menua tu nyereta kitai, begulai ngabang seraya ngelala enggau meda adat lama aki ini kitai menya maya sida ngintu gawai besai.

Sebarang tanya enggau penerang silik pasal pejalai ngabang tu tau betanya ngagai Alim Giovanni Adlim ba lumur 012-846 7234 enggau Victor (014-8862637).